Informe di Proclamadónan di Reino

“Pa Dios Tur Cos Ta Posibel”

E PALABRANAN mencioná ariba, cu nos ta haña na Mateo 19:26, a resultá di ta cierto pa un mucha muher na Venezuela. Despues cu el a siña pone pleno confiansa den Jehova, e por a vence un problema serio. E ta conta:

“Mi wela tabata masha bondadoso i cariñoso. Lamentablemente, el a muri tempu mi tabatin apénas 16 aña. Su morto tabata un golpi teribel pa mi. Mi a perde mi balansa mental i mi no kier a ni sali for di cas bai den curá. Casi mi a para bira un ermitaño.

Mi no tabata bai scol, ni mi no tabatin trabou. Mi tabata djis keda den mi kamber. Solitario i sin ningun amiga, mi a sufri di depresion pisá. Mi a sinti cu mi no a bal nada i mi kier a caba cu mi bida i muri. Tur ora mi tabata puntra mi mes: ‘Pakico mi ta existí?’

Mi mama tabata ricibí e revistanan Toren di Vigilancia i Spierta! for di un Testigo yong cu yama Gisela. Un dia mi mama a mira Gisela ora e tabata pasa banda di nos cas i a puntr’é si e por a yuda mi. Gisela a bai eens pa purba, pero ami a nenga di topa cuné. Pero Gisela no a legumai. El a skirbi mi un carta i bisa mi cu e kier tabata mi amiga i cu un persona muchu mas importante cuné tambe kier tabata mi amigu. El a bisa cu e persona ei tabata Jehova Dios.

Esaki a conmové mi, i mi a contestá su carta. Tres luna largu nos a skirbi otro. Ta despues di hopi estímulo di parti di Gisela cu finalmente mi a haña e curashi pa topa cuné. Na nos promé encuentro, Gisela a studia Bijbel cu mi, for dje buki Bo por biba pa semper den Paradijs riba tera. Despues dje studio, el a invitá mi pa asistí na un reunion n’e Salon di Reino local. Esei a coge mi di sorpresa. Cuater aña largu mi no a sali cas, i e idea di sali riba caya a duna mi miedu.

Gisela tabatin hopi pacenshi cu mi. El a garantisá mi cu mi no tabatin nodi tene miedu di nada i cu lo el a compañá mi bai e reunion. Finalmente mi a bai eens. Ora nos a yega n’e Salon di Reino, mi a cuminsá tembla i soda. Mi no por a cumindá ningun hende. Tog, mi a bai eens pa sigui asistí n’e reunionnan, i tur siman Gisela tabata pasa busca mi fielmente.

Pa yuda mi vence mi nerviosidad, Gisela tabata bai reunion masha trempan cu mi. Nos tabata para na porta i cumindá tur hende segun cu nan tabata yega. Dje manera ei mi tabata haña mi cu un of dos hende so, en bes di henter un grupo pareu. Ora mi tabata sinti cu mi no por a wanta mas, Gisela tabata cita Mateo 19:26 pa mi: ‘Pa hende esaki ta imposibel, pero pa Dios tur cos ta posibel.’

Aunke no tabata fácil, cu tempu mi por a asta asistí na un reunion asta mas grandi, na un asamblea di circuito. Ki un stap grandísimo esei tabata pa mi! Na september 1995, mi a tuma e curashi pa papia cu e ancianonan pa mi participá den e ministerio di cas-pa-cas. Seis luna despues, na april 1996, mi a simbolisá mi dedicacion na Jehova cu bautismo bou di awa.

Ora un persona a puntra mi ki dia ei, unda mi a haña e curashi pa haci esaki, mi a contestá: ‘Mi deseo pa agradá Jehova ta mas grandi cu mi miedu.’ Aunke te ainda mi sa haña atake di depresion de bes en cuando, mi goso a aumentá dor cu awor cu mi ta traha como pionero regular. Mirando bek, mi ta di acuerdo cu Gisela. Awor mi tin un Amigu cu ta interesá den mi i cu ta ‘duna mi poder.’”—Filipensenan 4:13.

[Plachi na página 8]

“Mi deseo pa agradá Jehova ta mas grandi cu mi miedu”