Amor pa Esnan ‘Relacioná den Fe’

CRISTIANNAN berdadero tin un vínculo manera di famia cu otro. Sí, desde e promé siglo E.C., nan ta yama otro “ruman.” (Marco 3:31-35; Filemon 1, 2) Esaki no ta djis un palabra; ta e manera cu adoradónan di Dios ta sinti pa cu otro. (Compará cu 1 Juan 4:7, 8.) Jesus a bisa: “Den esaki tur lo sa cu boso ta mi disipelnan, si boso tin amor entre boso.”—Juan 13:35.

Un amor asina tabata bisto na juli 1997 ora un secura largu a bin caba den yobida torencial i inundacion na Chile. Di ripiente, hopi hende tabatin mester di cuminda, paña i otro artículonan. Ora tin desaster, Testigonan di Jehova ta haci esfuerso pa sigui Pablo su spiertamentu n’e galationan: “Realmente anto, miéntras cu nos tin tempu faborabel p’e, laga nos obra loke ta bon pa cu tur, pero specialmente pa cu esnan relacioná cu nos den e fe.”—Galationan 6:10.

P’esei, Testigonan di Jehova a organisá nan mes lihé pa haci algu. Nan a colectá, surti i paketá alimento, paña i otro cosnan, i despues a manda nan p’e área di desaster. Muchanan a duna asta co’i hunga! Un ruman muher a keda hopi asombrá ora el a mira e Salon di Reino yen di suministro di auxilio. “Mi a keda babucá, sin sa si mi mester hari of yora,” e ta bisa. “Tabata net loke nos tabatin mester.”

Anto, inesperadamente, un temblor a asotá un parti dje mésun área afectá p’e inundacion. Esei a basha hopi cas abou. Pa por percurá p’e necesidad, a forma mas comité di auxilio. Comiténan Regional di Construccion, cu normalmente sa atendé construccion di facilidadnan di reunion di Testigonan di Jehova, a cai aden i a duna nan sosten. E resultado? Nan a haci donacion di casnan modesto—diseñá i construí dor dje rumannan—na esnan cu a perde cas. Aunke e casnan aki no tabata grandi ni luhoso, nan tabata un contraste skerpi cu esnan cu programanan seglar di auxilio a duna riba un base di fiansa i cu no tabatin ni flur ni bentana i no tabata di verf.

Algun ruman a biaha distancianan largu pa duna yudansa. E presidente di un Comité Regional di Construccion a bishitá e área pa inspeccioná e daño pa dos dia largu, apesar cu e tabata den un rolstoel. Un ruman ciegu a traha duru, cargando biga di palu p’e carpinté corta n’e tamaño deseá. Un ruman surdu tabata tuma e biganan i hiba nan caminda tabatin mester di nan.

Hopi observadó a keda impresioná cu e yudansa cu e rumannan a duna. Den un pueblo un auto di polis tabata stacioná banda di cas di un ruman muher cu nan tabata drecha. E polisnan tabata curioso. Un di nan a puntra un ruman homber: “Ken e trahadónan contentu aki ta, i cuantu nan ta paga nan?” E ruman a splik’é cu nan tur tabata boluntario. Un dje polisnan a splica cu tur luna e ta paga diesmo na su iglesia, i tog su pastor no a ni bishit’é despues dje temblor! E siguiente dia e ruman muher a ricibí un yamada di telefon for di un oficial di polis. E tambe a observá e trahadónan. El a bisa cu e spiritu entusiasmá dje trahadónan a impresion’é asina tantu cu casi el a djoin nan!

Berdaderamente, e programa di auxilio na Chile tabata un experencia gososo p’e boluntarionan i un testimonio excelente pa observadónan.