E Sabiduria pa “Premirá Kico Lo Sosodé”
“NAN ta un pueblo cu a perde nan bon huicio i nan no tin comprendimentu. Si nan tabata sabí, nan lo a comprendé esaki i premirá kico lo sosodé cu nan.”—Deuteronomio 32:28, 29, Beck.
Moises a papia e palabranan aki cu e israelitanan ora nan tabata pará na drempel dje Tera Primintí. Moises a pronosticá tocante un tempu ora cu nan lo a bandoná Jehova i lo no a pensa riba e consecuencianan di nan accionnan. Durante e siglonan cu a sigui, e pueblo di Israel—incluso hopi rey—a ignorá e spiertamentunan di Dios.
Tuma Sálomon. E tabata sa dje mandamentu divino pa no casa cu adoradónan di otro dios cu no ta Jehova. (Deuteronomio 7:1-4) Tog, e tabatin “hopi esposa stranhero.” E resultado? Bijbel ta bisa: “A sosodé cu ora Sálomon a bira bieu, su esposanan mes a pone su curason incliná pa sigui otro diosnan; i su curason no a resultá completo pa cu Jehova su Dios manera e curason di su tata David.” (1 Reynan 11:1, 4) Aunke Sálomon tabata un homber sabí, e no tabatin e bon huicio pa ‘premirá kico lo a sosodé’ si e desobedecé e mandamentu di Dios.
Ki tal di nos? Nos por evitá hopi dolor si di antemano nos pensa bon riba decisionnan di bida. Por ehempel, Bijbel ta amonestá cristiannan pa “limpia [nan] mes di tur contaminacion di carni i di spiritu.” (2 Corintionan 7:1) Ta sabí pa haci esaki, pero hopi hende no tin e bon huicio pa premirá kico lo sosodé si nan ignorá e conseho di Pablo. Por ehempel, hopi hóben ta contaminá nan curpa dor di huma. Nan ta pensa cu esaki ta duna nan un toke sofisticá i adulto. Pero, ki trágico ora cu despues den bida, como resultado di esei un cantidad di nan ta sufri di problema di curason, cancer di pulmon of enfisema!
Ta importante pa pensa seriamente riba e consecuencianan di nos decision i accionnan. Cu bon motibu, Pablo a skirbi: “Kico cu hende sembra, esaki lo e cosechá tambe; pasobra esun cu sembra cu su carni na bista lo cosechá corupcion for di su carni, pero esun cu sembra cu e spiritu na bista lo cosechá bida eterno for dje spiritu.”—Galationan 6:7, 8.