Nan “A Teme e Dios Berdadero”

MIENTRAS e israelitanan tabata den sclabitud na Egipto, e parteranan hebreo, Sifrá i Puá, a haña nan den un situacion difícil. Den un intento pa controlá e crecementu rápido dje poblacion stranhero, fárao a ordená e muhernan aki: “Ora boso yuda e muhernan hebreo duna lus . . . , si ta un yu homber, boso tin cu mat’é.”—Exodo 1:15, 16.

Sifrá i Puá “a teme e Dios berdadero,” i p’esei nan a tuma curashi i “no a haci loke e rey di Egipto a bisa nan.” En bes di esei, nan a laga e babynan homber na bida, aunke e posicion di curashi aki por a pone nan den peliger. Jehova “a trata e parteranan bon,” i a recompensá nan pa nan actonan cu a salba bida.—Exodo 1:17-21.

E relato aki ta resaltá Jehova su aprecio pa esnan cu ta sirbié. E por a considerá loke Sifrá cu Puá a haci djis como un obra humanitario, aunke e tabata un acto di curashi. Al fin i al cabo, ningun hende muher na su sano huicio lo no mata un baby! Tog, Jehova sin duda a tene cuenta cu debí na miedu di hende, algun persona a cometé actonan horibel. E tabata sa cu no ta bondad humano so a motivá e muhernan aki, sino tambe temor i debocion na Dios.

Esta gradicidu nos por ta cu nos ta sirbi un Dios cu ta tuma nota di nos actonan fiel! Ta cierto cu kisas ningun di nos no a haña nos bou dje prueba di fe cu Sifrá i Puá a haña nan cuné. Tog, ora nos para firme pa loke ta bon, sea na scol, na trabou of den cualkier otro situacion, Jehova no ta considerá nos amor leal como algu di poco importancia. Al contrario, e “ta bira e recompensador di esnan cu ta busk’é cu empeño.” (Hebreonan 11:6) Sí, “Dios no ta inhustu p’e lubidá boso trabou i e amor cu boso a mustra pa su nomber, p’e echo cu boso a sirbi e santunan i ta sigui sirbi.”—Hebreonan 6:10.