El A Yuda Plama Lus “te na Extremidad di Tera”
APOSTEL Pablo a ser usá pa plama lus spiritual “te na extremidad di tera.” Como resultado, hopi hende “corectamente dispuesto pa bida eterno a bira creyente.”—Echonan 13:47, 48; Isaías 49:6.
Un deseo sincero pa plama lus spiritual tabata bisto tambe den e bida dedicá i esfuersonan cristian incansabel di William Lloyd Barry, miembro dje Cuerpo Gobernante di Testigonan di Jehova. Ruman Barry a fayecé dia 2 di juli 1999, durante un parti cu e tabatin na un congreso di distrito na Hawai.
Lloyd Barry a nace na Nueva Zelandia dia 20 di december 1916. Su mama i tata a mustra interes activo den e berdadnan di Bijbel presentá den e publicacionnan di C. T. Russell, cu Watch Tower Bible and Tract Society tabata distribuí. P’esei, ruman Barry a lanta den un hogar cristian deboto.
Aunke e tabatin interes den deporte i educacion, i a asta logra un grado académico den ciencia, ruman Barry a mantené su enfoke bon fihá riba cosnan spiritual. Pues, dia 1 di januari 1939, el a cuminsá cu e ministerio di tempu completo i a bira miembro dje famia di Betel n’e oficina di Sociedad na Australia. Despues cu gobiernu a prohibí Sociedad di funcioná na 1941, ruman Barry a sigui haci trabou di oficina. Algun bes nan a asign’é pa skirbi material di animacion pa compañeronan creyente. E tabata ehemplar tambe den hiba delantera den e ministerio público.
Na februari 1942, ruman Barry a casa cu un otro sirbidó di tempu completo. Su esposa amoroso, Melba, a traha tur e añanan aki fielmente lado a lado cuné den hopi parti di tera. Nan a dal un stap grandi den direccion di sirbishi den teritorionan stranhero dor di asistí n’e di 11 klas dje Scol Bíblico di Galad di Watchtower na Merca. Nan asignacion tabata caminda hopi hende lo a considerá ‘un extremidad di tera’: Hapon. Despues cu nan a yega ei na november 1949, nan a cuminsá sirbi como misionero den e stad portuario di Kobe. E tempu ei tabatin apénas 12 persona ta predicá e bon nobo na Hapon. Ruman Barry a siña e idioma i custumbernan di su hogar nobo i a desaroyá un cariño profundo p’e pueblo hapones, kende el a sirbi e siguiente 25 añanan. Su amor pa esnan “cu tabata corectamente dispuesto pa bida eterno” tabata bisto p’e hermandad cristian creciente na Hapon. Esei a yud’é ser eficas den supervisá e sucursal pa décadanan.
Meimei di aña 1975, tempu cu tabatin rond di 30.000 Testigo na Hapon, famia Barry a ser transferí pa Brooklyn, New York. Como cristian ungí cu spiritu, ruman Barry a haña invitacion pa sirbi como miembro dje Cuerpo Gobernante di Testigonan di Jehova. (Romanonan 8:16, 17) Su experencia den skirbimentu a resultá di ta útil den su papel nobo den e Departamento di Redaccion. I su experencia extenso den asuntunan di sucursal i internacional a ekip’é pa duna un contribucion balioso como miembro dje Comité di Publicacion dje Cuerpo Gobernante.
Atrabes di añanan, ruman Barry a keda cu su amor pa Lehano Oriente i pa su pueblo. Studiantenan di Scol di Galad i tambe miembronan dje famia di Betel por tabatin sigur cu su discurso i comentarionan lo a resaltá relatonan emocionante tocante hopi ruman cu a sirbi den e trabou di misionero. E actividadnan di predicá e Reino ‘n’e extremidadnan di tera’ en berdad a haña bida ora cu ruman Barry di un forma entusiasmá tabata relatá su mes experencianan. Algun di esakinan ta ser mencioná den su historia di bida den E Toren di Vigilancia [na ingles] di 15 di september 1960.
Nos ta sigur cu como ‘co-heredero cu Cristo,’ ruman Barry su interes den esnan “corectamente dispuesto pa bida eterno” lo sigui. Claro cu tur ruman cu a conoc’é como un homber spiritual, henteramente dedicá na Jehova i cu tabatin tierno cariño p’e pueblo di Dios, lo sinti su falta mashá. Pero nos ta alegrá cu ruman Barry a wanta fielmente te na fin di su curso terenal.—Revelacion 2:10.
[Plachi na página 16]
Dia cu Lloyd Barry i John Barr a presentá e publicacion nobo “Perspicacia pa Comprendé e Scritura” na 1988
[Plachi na página 16]
Graduadonan dje di 11 klas di Galad, reuní na Hapon despues di 40 aña