“Un Firmesa di Caracter Inspirá dor di Fe”

BOU di hopi crítica, aña 1998 a mira publicacion di un buki nobo na frances titulá Les Témoins de Jéhovah face à Hitler (Testigonan di Jehova Ta Enfrentá Hitler), skirbí dor di Guy Canonici. Den prólogo dje buki, e historiadó frances masha respetá, François Bédarida, a skirbi: “E buki aki ta hopi bon biní. No djis pasobra e ta yena un bashí, pero pa motibu cu el a sali na ora. . . . Ken, fuera dje specialistanan, sa tocante e destino di Testigonan di Jehova bou dje Tercer Reich? Sí, durante henter e régimen cu a dura 12 aña, nan a encontrá cu persecucion acompañá cu crueldad i violencia implacabel. Nan tambe a experenciá e horor dje camponan di concentracion. Nan tambe a paga un prijs haltu pa nan fe i conviccionnan. Di con historia a lubidá e cristiannan aki? . . .

Di con nan a persiguí un secta chikitu, plamá i inofensivo den un forma asina cruel i sistemático? Esaki ta e punto clave dje paradox: Testigonan na Alemania no solamente tabata djis un minoria masha chikitu dje poblacion—segun estadística nan tabata un total di 20.000 persona na comparacion cu e mas cu 60 miyon habitantenan—pero tambe nan tur tabata ciudadanonan pacífico cu a respetá ley i cu no tabata un menasa pa ningun hende. E único cos cu nan a deseá tabata traha i lanta nan yunan dignamente. . . .

E persecucion aki a topa cu un resistencia spiritual fuerte i victorioso di creyentenan cu tabatin e capacidad pa usa e forsa interno di nan fe den Jesucristo contra e poder di preshon externo cu a cuminsá cu violencia físico na man dje Estado policial, te n’e punto di conducta heróico i muri como mártir.”

E relato di Testigonan di Jehova cu a sufri como mártir pa motibu di nan fe cristian ora nan a confrontá intolerancia religioso ta unu poderoso. Den su análisis dje buki, un korant católico prominente na frances, La Croix, a dal net riba cabes dje clabu: “Di nan historia poco conocí, Guy Canonici a reuní un gran cantidad di testimonio cu ta laga bo boca habrí ora bo mira un firmesa di caracter inspirá dor di fe expresá cu palabranan masha simpel. Un fe cu tabata inkebrantabel te final asta cerca e muchanan. E conmemoracion aki mester sirbi como un antecedente p’e debate actual tocante e naturalesa cristian di Testigonan di Jehova.”