Ser Humano—Djis un Animal Superior?

“Ta haci un diferencia kico nos ta kere tocante e orígen di bida?”

Un mucha muher di 16 aña na Brazil a haci e pregunta aki den introduccion di su spreekbeurt riba e tema: “Ser Humano—Djis un Animal Superior?” Despues cu su maestra a ricibí un ehemplar dje edicion di Spierta! na portugues di 22 di juni 1998 cu tabatin e tema ei, e maestra a pidié pa combersá cu e klas riba e pregunta ei.

E hóben Testigo a enfatisá con desastroso e teoria di evolucion basá riba e pensamentu di cu esun mas fuerte di naturalesa ta sobrebibí, a resultá. Por ehempel, hopi hende ta pensa cu e teoria di evolucion a pone algun mira guera como djis un parti natural dje lucha eterno pa sobrebibí. I esei a yuda habri caminda pa facismo i nazismo desaroyá.

E studiante a mustra cu tin un diferencia grandi entre hende i animal. El a bisa: “Ta hende so por desaroyá spiritualidad. Ta hende so ta purba descubrí e nificacion i propósito di bida. Ta hende so ta ser perturbá dor di morto, i ta nan ta preocupá tocante nan orígen i ta deseá di biba pa semper. Ta ki importante anto pa nos dedicá tempu pa haña sa un poco mas tocante nos orígen!”

E maestra a elogiá e excelente presentacion aki. El a atribuí e éxito n’e echo cu e tiener Testigo aki ta gusta lesa. Na scol e mucha muher ta conocí como un gran lesadó di publicacionnan basá riba Bijbel, manera Spierta! i E Toren di Vigilancia.

Testigonan di Jehova ta sinceramente preocupá pa e efecto cu e teoria di evolucion tin riba curason i mente di hóbennan. P’e motibu aki, e congregacion cu cua e mucha muher aki ta asociá a animá Testigonan hóben pa duna nan maestro i compañeronan di scol un ehemplar dje Spierta! di 22 di juni 1998. Nan a laga mas of ménos 230 revista na vários scol den e stad. Hefe dje Departamento di Ciencia na un scol a aboná riba e revista Spierta!

Sí, loke nos ta kere tocante e orígen di bida ta haci un diferencia! E persona hóben aki i su amigunan a mustra cu e echo cu nan ta kere den e Creador a haci un berdadero diferencia den nan bida.