El A Muri pa Principio

“NOS TA recordá August Dickmann (nací na 1910), un Testigo di Jehova.” Asina e inscripcion riba un plakat (mustrá aki) cu nan a desvelá recientemente den e ex-campo di concentracion na Sachsenhausen ta cuminsá. Con bin un Testigo di Jehova a merecé un plakat asina? E resto dje inscripcion ta duna e relato: “Dia 15 di september 1939, SS a tira [e] mata públicamente debí cu el a rechasá loke ta contra su principionan.”

Nan a interná August Dickmann den e campo di concentracion Sachsenhausen na 1937. Tres dia despues cu Segundo Guera Mundial a dal aden, el a haña ordu pa firma su formulario di admision den servicio militar. Ora el a nenga, e comandante dje campo a tuma contacto cu Heinrich Himmler, cabesante di SS (Schutzstaffel, guardia special di Hitler), i a pidi permit pa ehecutá Dickmann den presencia di tur otro prezu den e campamentu. Dia 17 di september 1939, The New York Times a informá for di Alemania: ‘Aki, un peloton di fusilamentu a tira August Dickmann di 29 aña mata.’ E korant a bisa cu Dickmann tabata e promé aleman cu a rechasá e guera ei debí na su principionan.

Sesenta aña despues, dia 18 di september 1999, Fundacion Conmemorativo di Brandenburg a conmemorá morto di Dickmann. I awor e plakat conmemorativo ta recordá bishitantenan di su curashi i fe firme. Un di dos plakat riba e muraya parti pafó dje ex-campo ta recordá bishitantenan cu Dickmann tabata solamente un di e mas o ménos 900 Testigonan di Jehova cu a sufri na Sachsenhausen pa motibu di nan creencianan. Tin hopi mas cu a sufri den otro camponan. Sí, asta bou dje condicionnan teribel di campo di concentracion, hopi Testigo a keda fiel na principionan divino.

Testigonan di Jehova ta considerá ‘sumision na autoridadnan superior [gubernamental]’ como un obligacion cristian. (Romanonan 13:1) Sin embargo, ora gobiernu ta purba forsa nan pa kibra Dios su leynan, nan ta sigui ehempel dje apostelnan di Cristo cu a bisa: “Nos tin cu obedecé Dios como gobernante mas bien cu hende.” (Echonan 5:29) Como resultado, den un mundu caminda enemistad entre tribu i odio étnico a hiba na atrocidadnan spantoso, Testigonan di Jehova na tur parti, mescos cu August Dickmann, ta sigui tras di pas. Nan ta sigui e exhortacion bíblico: “No laga malu vence bo, sino sigui vence malu cu bon.”—Romanonan 12:21.