Mayornan Ta Protestá Contra Prehuicio di un Maestro

Un maestro di scol básico na Cassano Murge, Italia, a duna algun di su alumnonan sticker bai cas cuné. E intencion tabata pa nan plak e stickernan aki riba porta dilanti. E stickernan tabatin e mensahe aki riba nan: “Nos ta católico. Nos ta pidi Testigonan di Jehova pa no bini na e porta aki.”

Aunke algun dje mayornan mes no tabata Testigo di Jehova, nan a protestá fuertemente contra loke e maestro a haci. Segun e korant Muoviti Muoviti, e mayornan a reclamá cu ‘duna e muchanan e clase di mensahe aki ta contribuí cu e muchanan ta bai rechasá tur hende cu no ta pensa manera nan of cu nan ta bai excluí un persona pasobra e tin un religion “diferente.”’ Un mama cu a skirbi e korant a yama e sticker “simia di un mal yerba, producto di ignorancia i bobedad.”

Manera e informe aki ta mustra, tin hopi hende imparcial cu ta reconocé e peligernan cu sembra simia di prehuicio ta trece cuné. Tambe nan ta admirá e ministerio cristian cu Testigonan di Jehova ta efectuá den henter Italia i rond mundu. Pakico no dal un paso mas aleu i puntra Testigonan di Jehova cua ta ‘un motibu p’e speransa den nan’? Nan lo ta ansioso pa consider’é cu bo, i nan lo hacié cu “respet profundo.”—1 Pedro 3:15.