Un Epidemia di Odio

“Nunca hende ta comprendé e hendenan cu nan ta odia.”—James Russell Lowell, Escritor I Diplomático.

PARCE cu odio ta tur caminda awendia. Nombernan manera Kósovo, Liberia, Littleton, Oost Timor i Sarajevo—i tambe neonazi, ‘skinhead,’ i supremacia blancu—a keda grabá den nos mente huntu cu imágennan persistente di ruina carbonisá, graf comun recien cobá i curpanan sin bida.

Soñonan di un futuro liber di odio, conflicto i violencia a keda desbaratá. Danielle Mitterand, casá dje defuntu presidente di Francia, ta conta lo siguiente tocante su hubentud: “Hende tabata soña di biba liber den un sociedad fraternal cu nan por a confia; di biba na pas cu nan mes i di biba den hende i cu hende; nan a soña di hiba un bida saludabel, trankil i digno den un mundu stabil i generoso cu lo a cuida nan.” Kico a pasa cu e idealnan ei? El a lamentá: “Mei siglo despues, echo ta cu nos soño ta bou di atake.”

Nos no por ignorá cu awendia odio ta lantando cabes di nobo. E ta mas plamá cu ántes, i e ta manifestá su mes cada bes cu ménos ripara. E sintimentu di siguridad individual cu miyones di hende ta considerá como normal, a bai atras dor di un ola di actonan sin sentido motivá dor di odio, cada un aparentemente mas horendo cu esun promé cuné. Asta si nos scapa di odio den nos cas of den nos pais, e ta loer riba nos for di un otro caminda. Probablemente nos ta mira evidencia di dje tur dia riba pantaya di television den noticia i den programanan tocante actualidad. Algu di dje a asta drenta Internet. Considerá algun ehempel.

E último década a presenciá un aumento sin precedente di nacionalismo. Tocante esaki Joseph S. Nye, Jr., director dje Centro di Asuntunan Internacional di Harvard, a remarcá: “Den gran parti di mundu nacionalismo ta birando mas fuerte, na lugá di mas swak. Na lugá di un solo pueblo mundial, tin yen di pueblito rond mundu cu cada bes ta desconfiá otro mas. Na su turno, esei ta crea mas chens pa conflicto lanta.”

Otro formanan di odio ta mas camuflá, scondí, den frontera dje mésun pais, of asta den e mésun bario. Ora cincu skinhead a asesiná un anciano sikh na Cánada, e suceso aki a “hala atencion na loke algun hende ta considerá un regreso di crímen motivá dor di odio den un pais hopi elogiá pa su tolerancia racial.” Na Alemania, despues di un bahada stabil den añanan anterior, atakenan racista dor di extremistanan a subi drásticamente cu 27 porciento na 1997. “Ta un desaroyo desanimante,” segun e minister di asuntunan interior, Manfred Kanther.

Na nort Albania un informe a revelá cu mas cu 6.000 mucha ta casi prizonero den nan mes cas, debí na miedu cu enemigu di nan famia lo tira riba nan. E muchanan aki ta víctima dje tradicion di vendetta, esta guera entre gruponan di famia, “cu a paralisá bida di miles di famia.” Na Merca, segun Buro Federal di Investigacion (FBI), “prehuicio racial tabata tras di mas cu mitar dje 7.755 crímennan motivá dor di odio cometí na 1998, i raportá na FBI.” Algun dje motibunan tras dje otro crímennan motivá dor di odio tabata prehuicio relacioná cu religion, cu orígen étnico of nacional, i cu hendikep físico.

Ademas, titularnan di noticia ta mustra tur dia riba un epidemia di xenofobia (miedu i odio pa hende desconocí of stranhero), dirigí principalmente contra refugiadonan, cu actualmente ta mas cu 21 miyon. Ta tristu, pero mayoria di esnan cu ta expresá odio contra stranhero ta hende hóben, instigá dor di figuranan político iresponsabel i otronan cu ta busca un grupo pa tira falta ariba p’e problemanan di sociedad. Señalnan ménos obvio dje mésun fenómeno ta entre otro: desconfiansa i intolerancia pa hende cu ta diferente, i pensa cu tur hende di un cierto grupo ta mescos.

Cua ta algun motibu dje epidemia di odio aki? I kico por haci pa caba cu odio? E siguiente artículo lo trata e preguntanan aki.

[Rekonosementu pa Potrèt na página 2]

Portada, ariba: UN PHOTO 186705/J. Isaac

[Rekonosementu pa Potrèt na página 3]

Daud/Sipa Press