Unidad Religioso Ta na Bista? — BIBLIOTEKA ONLINE Watchtower

Unidad Religioso Ta na Bista?

“Nos ta testigo di un dia significativo den historia di nos iglesianan,” Christian Krause, presidente di Federacion Mundial Luterano, a bisa. Di igual manera, Papa Juan Pablo II a papia di “un logro significativo riba e caminda difícil pa reconstruccion di unidad completo entre cristiannan.”

E proclamacionnan entusiasmá aki tabata un reaccion riba e echo cu a firma un Declaracion Oficial Comun, riba 31 di october 1999, na Augsburg, Alemania, confirmando asina e Declaracion Conhunto riba e Doctrina di Hustificacion. Lugá i ora dje evento tabata bon scogí. Nan ta bisa cu riba 31 di october 1517, Martin Luther a claba su 95 tésisnan riba porta dje iglesia-kasteel na Wittenberg, i asina a duna inicio na e Reformacion Protestant. Augsburg, naturalmente, tabata caminda na aña 1530 e luteranonan a presentá nan creencianan básico, e Confesion di Augsburg, cu Iglesia Católico a rechasá, loke a hiba na un kiebro ireconciliabel entre protestantismo i catolicismo.

E Declaracion Conhunto lo ta un paso decisivo pa vence e division dje iglesia, manera ta ser afirmá? No ta tur e partidonan tabata optimista. Mas cu 250 teólogo protestant a firma un peticion contrario, dunando spiertamentu cu Iglesia Católico kier tuma over. Tambe protestantnan a iritá ora cu Iglesia Católico a declará un indulgencia special pa aña 2000, e mésun práctica cu a causa e kiebro un 500 aña pasá. I ya cu tantu e Confesion di Augsburg como e rechaso católico dor di e Concilio di Trent ainda ta na vigor, unidad ta leu di ta sigur.

Division i desacuerdo den cristiandad ta muchu mas grandi cu loke firmamentu di cualkier declaracion conhunto por corigí. Ademas, unidad di fe ta dependé di creencianan firmemente basá riba e Palabra di Dios, Bijbel. (Efesionan 4:3-6) En bes di logra unidad dor di comprometé, berdadero unidad ta ser lográ dor di siña i haci loke Dios ta pidi di nos. “Tur pueblo, di nan parti, lo cana cada un den e nomber di nan dios,” fiel profeta Mikéas a declará, “pero nos, di nos parti, lo cana den e nomber di Jehova nos Dios te na tempu indefiní, asta pa semper.”—Mikéas 4:5.

[Rekonosementu pa Potrèt na página 32]