Bo Por Ta Berdaderamente Felis?

GEORGE tabata cumindá tur hende cu un smile. P’e, bida tabata un regalo precioso pa disfrutá di dje. E tabata conocí pa su felicidad i optimismo, asta mas segun cu el a cuminsá sinti e dolornan di behes. Te dia cu el a muri, hende a conocé George como un hende felis. Abo ta felis manera George? Bo ta mira cada dia nobo como un regalo pa disfrutá di dje? Of bo ta indiferente of asta preocupá ora bo pensa riba e siguiente dia? Tin algu cu ta horta bo felicidad?

Felicidad a yega di ser definí como un estado di bienestar cu ta relativamente permanente. E ta ser caracterisá pa emocionnan cu ta varia di satisfaccion te na goso profundo i intenso, i un deseo natural pa e estado ei continuá. Felicidad asina ta existí di berdad?

Awendia sociedad ta fomentá e punto di bista cu si hende ta suficiente ricu, esei mes ta suficiente pa nan ta felis. Miyones di hende ta hiba un bida anshá den nan esfuerso desesperá pa bira ricu. Den e proceso, hopi di nan ta sacrificá relacionnan personal i otro cosnan importante den bida. Nan ta core bai-bin constantemente manera vruminga rond di nan neshi, i no tin masha tempu pa refleccioná ni pa dedicá na otro. Ta di comprendé cu “e cantidad di hende diagnosticá cu depresion ta sigui subi,” segun un reportahe den Los Angeles Times, “i e edad cu [depresion] ta cuminsá ta sigui baha. . . . Remedi antidepresivo ta riba e lista di ‘best-seller’ di companianan di remedi.” Miyones di hende ta usa droga of remedi ilegal, of ta purba suprimí nan problemanan cu alcohol. Algun hende ta cuminsá cumpra cos pa loco ora nan ta sinti deprimí. Den un encuesta, “hende muher a sali como esnan mas incliná na haci cómpras pa combatí nan depresion,” segun e korant británico The Guardian. “Ora nan ta deprimí, ta tres biaha mas probabel cu hende muher lo bai di cómpras, compará cu hende homber.”

Sin embargo, bo no ta haña berdadero felicidad den un tienda, un botter di bebida, un píldora, un angua ni un cuenta di banco. Felicidad no ta na benta; e ta grátis. Unda nos por haña un regalo precioso asina? Nos lo trata esaki den e siguiente artículo.