‘Salomon No Tabata Bistí Manera Un di Esakinan’

FLOR di sabana manera esnan ku bo ta mira riba e página aki ta un bista normal kantu di kaminda den parti sùit di Afrika. Nan ta yama nan kosmos, i originalmente nan ta bini di e área tropikal di Amérika. E flornan bunita aki kisas ta pone nos kòrda un lès ku Hesus a siña hende. Hopi di su oyentenan tabata hende pober, i nan tabata preokupá tokante nan nesesidatnan físiko, esta, kuminda i paña.

Hesus a puntra: “Pakiko boso ta preokupá boso mes ku bistimentu? Mira kon e lelinan di sabana ta krese; nan no ta traha mata kurpa, ni nan no ta hila, ma mi ta bisa boso ku asta Salomon den tur su gloria no tabata bistí manera un di esakinan.”​—Mateo 6:​28, 29.

Hende a sugerí vários posibilidat relashoná ku e tipo spesífiko di flor di sabana ku Hesus tabatin na mente. Sin embargo, Hesus a kompar’é ku gewon yerba di sabana, bisando: “Ma si di tal manera Dios ta bisti e yerba di sabana, ku awe t’ei i mañan ta wòrdu tirá den fòrnu, lo e no hasi muchu mas pa boso, o hendenan di poko fe?”​—Mateo 6:30.

Ounke e flornan kosmos no a krese originalmente den Israel, nan sigur ta konfirmá e lès ku Hesus a siña otronan. Sea ku bo mira nan djaleu òf bo eksaminá nan djaserka, nan ta masha bunita mes i sakadó di potrèt i artista gusta saka nan potrèt òf pinta nan. Di bèrdat Hesus no a eksagerá ora el a bisa, “asta Salomon den tur su gloria no tabata bistí manera un di esakinan.”

Kiko ta e lès pa nos awe? Hende ku ta sirbi Dios por ta sigur ku lo e yuda nan haña e nesesidatnan di bida asta den tempu difísil. Hesus a splika: “Buska [Dios] su reino, i e kosnan aki [manera kuminda i paña nesesario] lo wòrdu añadí na boso.” (Lukas 12:31) Sí, nos ta haña berdadero benefisio dor di buska e Reino di Dios. Pero bo sa kiko e Reino di Dios ta i kiko lo e hasi pa humanidat? Testigunan di Yehova gustosamente lo yuda bo haña e kontesta for di Beibel.