El A Stima Bondat

DJASABRA 22 di mart 2003, Milton G. Henschel, kende tabata un miembro di Kuerpo Gobernante di Testigunan di Yehova pa hopi aña, a terminá su bida riba tera. E tabatin 82 aña di edat.

Ora Milton Henschel tabata hóben el a kuminsá traha na e sede mundial di Testigunan di Yehova i a sirbi fielmente pa mas ku 60 aña. No a tarda hopi ku el a bira konosí pa su bon huisio i interes sinsero den e trabou di prediká e Reino. Na 1939 el a bira sekretario di N. H. Knorr, kende e tempu ei tabata superintendente di e imprenta di Testigunan di Yehova na Brooklyn. Na 1942, ora ku Ruman Knorr a kuminsá dirigí e trabou di e Testigunan rònt mundu, Ruman Henschel a keda komo su asistènt. Ruman Henschel a kasa ku Lucille Bennett na 1956, i huntu nan a pasa den e gosonan i desafionan di bida.

Ruman Henschel a traha estrechamente ku Ruman Knorr te ora Ruman Knorr a muri na 1977. Huntu ku Ruman Knorr, Ruman Henschel a bai mas ku 150 pais pa bishitá i animá Testigunan di Yehova rònt mundu, spesialmente misioneronan i esnan den ofisinanan di sukursal. Tin bes e biahenan ei tabata pisá i asta peligroso. Miéntras Ruman Henschel tabata di bishita na Liberia pa un kongreso na 1963, el a bira víktima di un persekushon kruel pasobra el a nenga di partisipá den un seremonia patriótiko.a Sin laga esei strob’é, djis un par di luna despues Ruman Henschel a bai Liberia atrobe p’e topa ku e presidente di e pais ei pa purba haña mas libertat di adorashon pa Testigunan di Yehova einan.

Ruman Henschel tabatin e reputashon di ta un hende fleksibel i rasonabel i tabatin un manera masha práktiko di trata ku problema- i desafionan. Spesialmente su koleganan tabata apresiá mashá su manera organisá di traha, su modestia i su bon sentido di humor. E tabatin masha bon memoria. Hopi misionero rònt mundu tabata gusta mashá ora e tabata kòrda nan nòmber bon, bisa un òf dos frase den e idioma lokal i hasi wega di palabra; tur esaki ku un brio den su wowo.

Mikeas 6:8 [NW] ta rekordá nos ku Yehova Dios kier pa nos “stima bondat.” Milton Henschel lo ser rekordá komo un bon ehèmpel den e aspekto aki. Apesar di su responsabilidat pisá, el a keda un hende aserkabel, amabel i bondadoso. E tabata gusta bisa ku ora bo no sa kiko pa hasi, e mihó kos ta: mustra bondat. Maske nos ta sinti duele ku nos a pèrdè e ruman stimá aki, nos ta kontentu ku el a keda fiel te na morto i nos tin sigur ku e ta risibí su rekompensa, “e korona di bida.”—Revelashon 2:10.

[Nota]

[Plachi na página 31]

M. G. Henschel huntu ku N. H. Knorr

[Plachi na página 31]

Huntu ku su kasá, Lucille