“E Palabra di Dios Sí Tin Poder!”
“E PALABRA di Dios ta bibu i aktivo.” (Hebreonan 4:12) Pa konfirmá e poder iresistibel di e Palabra di Dios, e Kalènder 2003 di Testigunan di Yehova a trata seis historia di bida for di tur parti di mundu. Bou di e enkabesamentu “Ántes i Awor,” e kalènder a mustra kon e trabou edukashonal di Testigunan di Yehova ta yuda hende drecha nan balornan moral, bandoná un estilo di bida dañino, fortalesé nan lasonan di famia i kultivá un relashon personal ku Dios.
Vários hende a manda karta pa mustra nan apresio pa e kalènder di 2003. At’akí algun di e komentarionan:
“E kalènder aki ta un prueba pa kristiannan berdadero ku tin otro hende meskos ku nan ku mester a hasi nan máksimo esfuerso pa e fe. Awor nan por wak e potrètnan komo un rekordatorio di e kambionan ku algun ruman a hasi.”—Steven, Merka.
“Mi tabatin ègt gana di skirbi algun palabra pa laga boso sa kon hopi e kalènder 2003 a touch mi kurason. Nunka un kalènder tabatin un impakto asina grandi riba mi. E historianan di bida aki lo bira un parti di e informashon ku mi ta kana rònt kuné den mi tas di sirbishi pa mi duna prueba bibu i konmovedor di e influensia ku Beibel por tin riba bida di hende.”—Marc, Bèlgika.
“E kalènder a konmové mi masha hopi mes. Mi a keda sumamente emoshoná ora mi a lesa i mira kon Yehova a kambia e hendenan aki. Komo resultado, mi a sinti mi motivá pa sigui hasi kambio den mi propio bida. Awor mas ku nunka, mi ta sinti ku mi ta parti di nos hermandat internashonal.”—Mary, Merka.
“Hesus a sinti kompashon pa e hendenan debí na e kondishon spiritual deplorabel ku nan tabata aden. Mi kier a gradisí boso pa e echo ku boso a imitá e ehèmpel di Kristu dor di publiká e historianan di bida ku tin den nos kalènder 2003. Nunka un kalènder no a yega di pone mi yora.”—Cassandra, Merka.
“Ora mi tabatin 11 aña, mi a kuminsá huma; mas despues mi a usa droga. Hopi bes mi a pensa di pone un fin na mi bida. Ora mi a konosé Yehova, mi a haña yudansa pa stòp ku e bisionan ei. E kalènder aki ta hopi importante pa mi. E ehèmpelnan di mi rumannan di tur parti di mundu ta fortalesé mi. Awor mi sa ku mi no ta mi so den e lucha aki i ku e kos mas importante ta amor pa Yehova i sirbishi di henter kurason na dje.”—Margaret, Polonia.
“He e, e Palabra di Dios sí tin poder! Na momentu ku mi a haña e kalènder di 2003, mi tabatin masha difikultat pa mi no yora. E eksperensianan aki, huntu ku e potrètnan, ta ègt fortalesé bo fe.”—Darlene, Merka.
“E estilo di bida ku algun di e rumannan aki tabatin ta masha paresido na loke ami a pasa aden. Yehova a duna mi forsa pa vense bisionan ku tabata parse imposibel pa vense. Masha, masha danki pa e historianan di bida aki.”—William, Merka.