Nos Mester Resa na Angel pa Yudansa?

TA KOREKTO pa resa na angel den tempu di angustia? Hopi hende ta pensa ku sí. De echo, e New Catholic Encyclopedia ta bisa: “Un hende por resa na . . . angel . . . pero solamente den e sentido ku nan por roga Dios pa nos.” Nos mester pidi angel pa intermediá pa nos?

E Palabra di Dios ta duna e nòmber di solamente dos angel fiel, Miguel ku Gabriel. (Daniel 8:16; 12:1; Lukas 1:26; Hudas 9) Komo ku Beibel ta menshoná e nòmbernan aki, nos por komprondé ku kada angel ta un persona spiritual individual ku un nòmber, i no simplemente un forsa òf energia impersonal. Sin embargo, tabatin otro angelnan ku a nenga di revelá nan nòmber. Por ehèmpel, ora Jakòb a puntra un angel ku a bishit’é kon su nòmber ta, e angel a nenga di bis’é. (Génesis 32:29; Huesnan 13:17, 18) Beibel no ta duna nos un lista di nòmber di angel, i asina ta evitá ku hende lo a duna nan demasiado atenshon.

Un di e tareanan di e angelnan ta pa hiba mensahe for di Dios pa hende. De echo, e palabra na hebreo i na griego original ku ta ser tradusí komo “angel,” literalmente ta nifiká “mensahero.” Sin embargo, angel no ta sirbi komo mediadó ku ta hiba orashon di hende na e trono di e Haltísimo. Dios a disidí ku orashon mester ta dirigí na dje den nòmber di su Yu Hesukristu, kende a bisa: “Tur loke boso pidi e Tata den mi nòmber, [lo] e duna boso.”—Juan 15:16; 1 Timoteo 2:5.

Yehova Dios nunka ta muchu okupá pa skucha nos, si nos aserk’é na e manera korekto. Beibel ta sigurá nos: “[Yehova] ta serka di tur esnan ku ta sklama na dje, serka di tur esnan ku ta sklama na dje den bèrdat.”—Salmo 145:18.