Ku Yudansa di Beibel El A Resistí Tentashon

Den e mundu djawe tin hopi tentashon. No ta fásil pa pega n’e normanan di Beibel. Por ehèmpel, kisas ta un reto pa obedesé e konseho bíbliko pa “hui for di inmoralidat.”—1 Korintionan 6:18.

Un Testigu di Yehova ku nos lo yama Sebastian tabata traha pa un kompania skandinavo na Polonia. E tabatin ku lucha duru pa mantené su integridat.

Na trabou tur hende tabata sa ku Sebastian ta un Testigu di Yehova. Su hefenan, ku a gusta su diligensia i tremendo karakter, a dun’é vários privilegio. Sin embargo, a resultá ku e privilegionan aki lo a oblig’é bai reunionnan di negoshi ku tabatin di haber ku entretenimentu kuestionabel.

No a dura muchu ku Sebastian a kuminsá haña duda. “Mi doño di trabou sa ku mi ta un Testigu di Yehova. Ta p’esei e ta konfia mi i ta konta ku mi. Si mi nenga di partisipá, mi ta pèrdè e trabou ku tabata asina difísil pa haña. Ke tal si mi no partisipá den e entretenimentu, sino opservá so?”

Entretantu Sebastian a haña sa mas di loke a ser sperá di dje. Lo e tabatin ku duna klientenan djafó un bon trato dor di sòru pa nan haña “mucha muhé” pa kompañá nan parti anochi pa propósitonan inmoral. Kiko e tabatin ku hasi awor?

Sebastian a disidí di rekordá su doño di trabou tokante su punto di bista bíbliko pa ku inmoralidat. Pronto a keda bisto ku e trabou aki no tabata p’e, i ku tardi òf trempan lo e tabatin ku kita. El a haña un trabou nobo ku un salario mas abou pero sin e tentashonnan ei. Awor e tin un konsenshi limpi.

Si hende pone preshon riba bo pa bo praktiká òf tolerá kosnan inmoral, kiko abo lo hasi? Lo bo ta dispuesto pa hasi un kambio drástiko? Esei ta loke Hosé di antigwedat a hasi, manera Génesis 39:7-12 ta mustra nos.