“Pa Promové e Nòmber di Yehova”

RÒNT mundu, E Toren di Vigilansia i su kompañero, e revista Spièrta!, ta masha gustá pa nan kontenido spiritual i balor instruktivo. Esaki a keda demostrá den e siguiente karta ku un lektor na Fransia a skirbi resientemente:

“Mi ta un señora yòn, originalmente di Afrika, ku masha poko skol. Poko tempu pasá, mi a kuminsá lesa boso revistanan. E temanan a atraé mi, i dor di nan mi a bin deskubrí e importansia di lesa. Danki na boso, mi vokabulario a bira mas amplio i awor mi por skirbi un karta ku ménos fout aden.

Mi ta keda asombrá kon boso ta trata tur loke tin di haber ku hende, nos planeta i e Kreadó. E artíkulonan aki ta asina fásil pa komprondé ku nan ta duna hende smak pa lesa. Niun otro grupo tin e kapasidat pa siña tur tipo di hende pareu.

Tambe mi ta keda asombrá ora mi mira ku boso ta hasi tur esaki no pa finnan komersial, sino simplemente pa promové e nòmber di Yehova. Mi sa ku su bendishon ta riba boso, i mi ta gradisí boso. Por fabor, laga e Kreadó sigui duna boso forsa pa boso por siña nos.”

Aktualmente Testigunan di Yehova ta efektuando nan obra di edukashon bíbliko den 235 pais. Nan ta publiká E Toren di Vigilansia den 148 idioma i Spièrta! den 87. Nan no ta imprimí e revistanan aki pa alabá hende. E konseho bíbliko i e informashon aktualisá ku nan ta kontené ta diseñá pa onra e Kreadó, kende ta bisa: “Ami, Yehova, ta . . . Esun ku ta siña bo benefisiá bo mes.” (Isaias 48:17, NW) Nos ta spera ku lo bo saka benefisio di e Santu Skritura dor di les’é regularmente huntu ku e publikashonnan aki diseñá pa studia Beibel.