“Nan Por A Sali Liber Mesora”
GENEVIÈVE DE GAULLE, un subrina di Charles de Gaulle, eks-presidente di Fransia, a konosé Testigunan di Yehova personalmente den e kampo di konsentrashon nazi na Ravensbrück, nort Alemania. El a skirbi e palabranan menshoná ariba den un karta na ougùstùs 1945.
E kampo di konsentrashon na Auschwitz, Polonia, a ser liberá dia 27 di yanüari 1945. Desde 1996, tur aña nan ta konmemorá riba e fecha aki e víktimanan di Hitler su Terser Reich.
Durante un diskurso ofisial di konmemorashon dia 27 di yanüari 2003, presidente di e Parlamento di Estado di Baden-Württemberg, Peter Straub, a komentá: “Tur e personanan ku a sufri persekushon pa motibu di nan kreensianan religioso òf polítiko i ku a preferá di muri en bes di someté nan mes [n’e régimen nazi] ta meresé nos gran rèspèt, un rèspèt ku ta difísil pa deskribí. Testigunan di Yehova tabata e úniko religion ku a nenga kompletamente di sede n’e eksigensianan di e régimen di Hitler: Nan no a hisa man pa hasi e saludo di Hitler. Nan a nenga di hura lealtat na ‘Führer i Estado,’ meskos ku nan a nenga di kumpli ku servisio militar i di labor. I nan yunan no a djòin e Movementu Hubenil di Hitler.”
Hesukristu a bisa di su siguidónan: “Nan no ta [parti] di mundu, meskos ku ami no ta [parti] di mundu.” (Juan 17:16) P’esei, e posishon di Testigunan di Yehova tabata basá puramente riba motibunan religioso. Straub a kontinuá: “Testigunan di Yehova, kendenan tabatin ku bisti un triángulo püs riba nan paña komo prezu di kampo di konsentrashon, tabata e únikonan ku por a pone fin na nan martirio. Tur loke nan tabatin ku hasi ta djis firma un deklarashon den kua nan ta nenga nan fe.”
E gran mayoria di Testigunan no a pensa mes riba e posibilidat di nenga nan fe. Pa motibu di esei, mas o ménos 1.200 di nan a muri durante e periodo nazi. Doshentisetenta a ser ehekutá pa motibu di nan prinsipionan. No ta ku boka so nan a kumpli ku e palabranan: “Nos mester obedesé Dios mas ku hende.”—Echonan 5:29.
Manera presidente di e Parlamento di Estado di Noord Rijn-Westfalia, Ulrich Schmidt, a bisa, Testigunan di Yehova no tabata un grupo di hende ekstraordinario. Refiriendo na su diskurso, e foyeto Landtag Intern a yama nan “hende komun i koriente ku, siguiendo nan konsenshi, a para firme pa nan kreensianan religioso, a demostrá kurashi komo siudadano i a oponé e ideologia [nazi] pa motibu di nan konvikshon kristian.” Nos por ta sigur ku tur esnan ku ta pega lealmente na Yehova Dios bou di sirkunstansianan difísil ta alegrá su kurason. Proverbionan 27:11 ta bisa: “Sea sabí, mi yu, i hasi mi kurason kontentu, pa mi por kontestá esun ku reprochá mi.”
[Rekonosementu pa Potrèt na página 30]
Pa kortesia di United States Holocaust Memorial Museum