“For di Awe Mi Ta Kere Ku Tin un Dios”
UN SEÑORA ukraniano ku yama Alexandra i ku ta biba na Praga, Repúblika Cheko, a sali trabou i tabata riba kaminda pa kas. Na un parada di tram, el a mira un estuche chikitu riba suela, ku e hendenan tabata skòp segun ku nan tabata kana pasa. Ora el a kohe e estuche i wak aden, e no por a kere su bista. Den dje tabatin un paki di biyete di 5.000 koruna! Aparentemente no tabatin ningun hende ei banda ta buska e estuche. Komo stranhero ku ta biba na Repúblika Cheko, no ta fásil pa Alexandra gana su pan di kada dia. Kiko e lo a hasi?
Ora Alexandra a yega kas, el a mustra su yu muhé Victoria e estuche. Nan a buska den e estuche pa mira si nan ta haña nòmber i adrès di e doño, pero en bano. Sin embargo, den e estuche tabatin un pida papel ku algun number skirbí ariba. Riba un banda di e papel tabatin un number di kuenta skirbí, i riba e otro banda tabatin mas number. Den e estuche tabatin tambe un papel di instrukshon na un banko lokal i un nota ku tabata bisa “330.000 koruna” (rònt di 10.000 dòler merikano). Esei tabata eksaktamente e montante di plaka ku tabatin den e estuche.
E esfuersonan di Alexandra pa yama e banko, usando loke a parse di ta un number di telefòn, no a duna resultado. P’esei el a bai e banko huntu ku su yu muhé i a splika nan kiko a pasa. El a puntra nan tokante e number di kuenta ku nan a haña den e estuche. Ma e banko no tabatin ningun registro di e kuenta ei. E siguiente dia, Alexandra a bolbe bèk ku e otro number ku tabata den e estuche. I en bèrdat, e banko tabatin un kliente, un señora, ku e number di kuenta ei. Alexandra i Victoria a tuma kontakto ku e señora, i e señora a konfirmá ku el a pèrdè e estuche. Ora ku nan tur a bini huntu finalmente, e señora a gradisí nan mashá i a puntra nan: “Kiko mi tin ku duna boso pa mi haña mi plaka bèk?”
Victoria a kontestá: “Nada. Si nos tabata ke e plaka, nos lo a keda kuné.” Den su cheko kibrá, el a splika: “Nos a trese e plaka bèk pa bo pasobra nos ta Testigu di Yehova. Nos konsenshi entrená pa Beibel no ta permití nos keda ku loke no ta di nos.” (Hebreonan 13:18) Kontentu, e señora a bisa: “For di awe mi ta kere ku tin un Dios.”