Siña Bo Yunan Duna Komentario

PERLA, kende ta biba na Mexico, ta kòrda ku tempu e tabata chikitu, su mama tabata yud’é prepará komentario kòrtiku pa e Estudio di Toren di Vigilansia. Awor Perla tin un yu hòmber di sinku aña. Kon e ta yud’é? “Ami mes ta prepará e Toren di Vigilansia promé. Ora mi ta hasié, mi ta buska un paragraf ku mi yu por komprondé, unu ku e por splika ku su mes palabra. E ora ei nos ta konsentrá riba loke e ta yama ‘mi paragraf.’ Mi ta pidié usa ehèmpel di kosnan di bida di tur dia p’e splika e informashon. Kaba nos ta repasá e komentario vários biaha. Nos ta usa un opheto tamaño di un mikrofon pa e sa kon e tin ku ten’é ora e ta duna komentario. Mi ta masha kontentu ku e no ta laga ni ún reunion pasa sin duna komentario òf hisa man. Mayoria biaha, e ta bai serka e konduktor promé ku e reunion kuminsá i bis’é kua ta ‘su’ paragraf.”

Jens, un ansiano ku ta sirbi den un grupo di abla hindi, tin dos yu hòmber, un di dos i un di kuater aña. Ora e ku su kasá ta prepará pa reunion huntu ku nan yunan, nan ta usa un método ku Jens a siña for di su mayornan. E ta bisa: “Nos ta disidí ki parti di e material e muchanan por komprondé. E ora ei nos ta purba duna nan un deskripshon general di e tópiko en partikular ei òf un resúmen di e puntonan prinsipal di e artíkulo, despues di kua nos ta hasi nan e preguntanan ku nos ke pa nan kontestá na reunion. Hopi bes nos ta keda sorprendí pa e kontestanan ku nan ta duna na un manera basta natural. E manera ku nan ta ekspresá nan mes ta reflehá realmente loke nan ta komprondé. Komo resultado, nan kontestanan ta bira un berdadero alabansa pa Yehova i un ekspreshon personal di nan fe.”