Dios Ta Haña Tur Forma di Adorashon Bon?

Kontestanan komun:

▪ “Tur ta kamindanan ku ta hiba na e mesun Dios.”

▪ “No ta importá loke bo ta kere basta bo ta sinsero.”

Kiko Hesus a bisa?

▪ “Drenta dor di e porta smal, pasobra hanchu ta e porta i espasioso e kaminda ku ta hiba na destrukshon, i hopi ta esnan ku ta drenta dor di dje. Pasobra chikitu ta e porta i smal e kaminda ku ta hiba na bida, i poko ta esnan ku ta hañ’é.” (Mateo 7:​13, 14) Hesus no a kere ku tur religion ta kamindanan ku ta hiba na Dios.

▪ “Hopi lo bisa mi den e dia ei: ‘Señor, Señor, nos no a profetisá den bo nòmber, i den bo nòmber a saka demoño, i den bo nòmber a hasi hopi milager?’ E ora ei lo mi deklará na nan: ‘Nunka mi no a konosé boso; bai for di mi, boso ku ta hasi inikidat.’” (Mateo 7:​22, 23) Hesus no ta aseptá tur hende ku ta bisa ku nan ta siguié.

HOPI hende religioso ta balorá nan kreensia- i tradishonnan. Pero kiko si e siñansanan akí no ta na armonia ku Beibel, e Palabra di Dios? Hesus a mustra kiko ta e peliger di sigui tradishon di hende ora el a bisa lidernan religioso di su tempu: “Boso a hasi e palabra di Dios bira inefektivo pa kousa di boso tradishon.” Despues el a sita Dios su palabranan i a bisa: “E pueblo akí ta onra mi ku nan lepnan, ma nan kurason ta leu for di mi. I ta en bano nan ta adorá mi, siñando preseptonan di hende komo doktrina.”​—Mateo 15:​1-9; Isaias 29:13.

No ta kreensia so ta importante; kondukta tambe ta importante. Beibel ta bisa di algun hende ku a pretendé di adorá Dios: “Nan ta profesá ku nan konosé Dios, ma ku nan echonan nan ta neng’é.” (Tito 1:16) De echo, Beibel ta bisa ku hende den nos tempu lo ta “mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder; evitá e sorto di hendenan akí.”​—2 Timoteo 3:​4, 5.

Sinseridat so no ta basta. Dikon no? Pasobra un hende por ta sinsero i tòg loke ku e ta kere por ta robes. P’esei konosementu eksakto tokante Dios ta masha importante. (Romanonan 10:​2, 3) Pa nos agradá Dios, nos mester atkerí konosementu di Beibel i aplik’é den nos bida. (Mateo 7:21) Pues, pa un hende adorá Dios na e manera korekto, su motivashon, kreensia i kondukta mester ta korekto. I un kondukta korekto ta nifiká hasi e boluntat di Dios tur dia!​—1 Juan 2:17.

Si bo kier haña sa kiko mas Beibel ta bisa tokante Dios, tuma kontakto ku Testigu di Yehova pa un estudio di Beibel grátis.

[Komentario na página 8]

Pa un hende adorá Dios na e manera korekto, su motivashon, kreensia i kondukta mester ta korekto