Bo Tabata Sa?
Fuera di Beibel, ki evidensia tin ku Hesus a eksistí realmente?
▪ Algun eskritor ku a biba alrededor di e tempu ku Hesus tabata na tera a menshoná su nòmber. Un di e eskritornan ei tabata Cornelio Tásito, kende a skirbi e historia di Roma den tempu di emperadornan. Relashoná ku un kandela ku a destruí Roma na aña 64 di nos era, Tásito a relatá ku rumornan tabata sirkulá ku ta Emperador Nero tabata responsabel pa e desaster ei. El a bisa tambe ku Nero a purba kulpa un grupo di hende ku e pueblo tabata yama kristian pa e destrukshon ei. Tásito a skirbi: “Kristu, for di kende nan nòmber ta derivá, a ser ehekutá na man di e prokuradó Ponsio Pilato durante e reinado di Tiberio.”—Annals, XV, 44.
E historiadó hudiu Flavio Hosefo tambe a menshoná Hesus. Hosefo a relatá susesonan ku a tuma lugá despues di morto di Festo, e prokuradó romano ku a goberná Hudea rònt di aña 62 di nos era, i promé ku yegada di su susesor Albino. Den Hosefo su relato, el a menshoná ku Sumo Saserdote Anas “a tene un reunion ku e huesnan di Sanedrin i a trese dilanti di nan e hòmber Santiago, ruman di Hesus ku nan tabata yama e Kristu, i algun otro persona.”—Jewish Antiquities, XX, 200 (ix, 1).
Dikon Hesus a ser yamá Kristu?
▪ E Evangelionan ta mustra ku angel Gabriel a aparesé na Maria pa bis’é ku lo e sali na estado i ku lo e haña un yu hòmber ku e mester yama Hesus. (Lukas 1:31) Den tempu bíbliko, hopi hudiu tabatin e nòmber ei. Fuera di esnan ku Beibel ta menshoná, e historiadó hudiu Hosefo a skirbi tokante 12 hende ku tabatin e nòmber Hesus. Ademas, Maria su yu tabata wòrdu yamá Hesus “di Názarèt,” loke a identifik’é komo e Hesus ku tabata biba na Názarèt. (Marko 10:47) E tabata konosí tambe komo “e Kristu” òf Hesukristu. (Mateo 16:16) Kiko esei ta nifiká?
E palabra “Kristu” ta bini for di e palabra griego Khri·stós, lokual ta un ekivalente di e palabra hebreo Ma·shí·ach (Mesias). Ámbos palabra ta nifiká “Ungí.” E ekspreshon akí a ser apliká apropiadamente na otro personanan promé ku Hesus. Por ehèmpel, Beibel ta bisa ku Moisés, Aaron i Rei David tabata personanan ungí, loke a nifiká ku Dios a nombrá nan pa asumí posishon di responsabilidat i outoridat. (Levítiko 4:3; 8:12; 2 Samuel 22:51; Hebreonan 11:24-26) Hesus, e Mesias ku Beibel a profetisá di dje, tabata e representante prinsipal di Yehova. P’esei, apropiadamente Hesus a ser yamá “Kristu, Yu di e Dios bibu.”—Mateo 16:16; Daniel 9:25.
[Plachi na página 12]
Pintura di Flavio Hosefo Su Kara