PREGUNTA DI LEKTOR

Kristiannan tin mag di krema nan defuntu?

Beibel no tin nada kontra di kremashon.

Algun relato bíbliko ta mustra ku hende a yega di kima kurpa òf wesu di hende morto. (Hos. 7:25; 2 Kró. 34:4, 5) Esei kisas tabata un indikashon ku e hendenan ei no a meresé un entiero digno. Ma no ta pa e motibu ei so nan tabata krema kadaver.

Nos por komprondé esei for di e relato tokante e morto di Rei Saul i su tres yu hòmbernan. Tur kuater a muri den guera kontra e filisteonan. Un di e yunan tabata Jonatan, amigu leal di David. Ora algun israelita balente ku tabata biba na Jabes di Galaad a tende loke a pasa, nan a bai buska e kuater kadavernan, kima nan i despues dera e wesunan. Despues David a elogiá e israelitanan pa loke nan a hasi.—1 Sam. 31:2, 8-13; 2 Sam. 2:4-6.

E speransa di Beibel pa hende morto ta resurekshon, esta, ku Dios ta restorá e persona bèk na bida. Sea su kurpa morto a ser kremá òf nò, esei no ta stroba Yehova di restor’é bèk na bida ku un kurpa nobo. Pensa riba e tres hebreonan fiel ku a enfrentá morto den un fòrnu di kandela, riba òrdu di Rei Nabukodonosor. Nan no tabatin nodi di tin miedu ku Dios lo no por a resusitá nan si akaso nan kurpa a kaba na nada den e kandela. (Dan. 3:16-18) Meskos ta konta tambe pa e kristiannan fiel ku a muri i despues a ser kremá den e kamponan di konsentrashon nazi. Tambe tin vários sirbidó leal di Dios ku a pèrdè nan bida den eksploshonnan òf otro aksidentenan sin ku a keda rastro di nan kurpa atras. Tòg nan resurekshon ta garantisá.—Rev. 20:13.

Pa Yehova resusitá un hende, e no tin nodi di form’é bèk ku e restunan di e kurpa ku e tabatin. Nos por mira esei for di e manera ku Dios ta resusitá kristian ungí pa bida selestial. Meskos ku Hesus, kende “a haña bida bèk den spiritu,” kristiannan ungí tambe ta resusitá ku e mesun personalidat, pero ku un kurpa spiritual. Nan no ta bai shelu ku ningun parti di nan kurpa físiko.—1 Ped. 3:18; 1 Kor. 15:42-53; 1 Huan 3:2.

Nos speransa den e resurekshon ta basá, no riba kiko lo pasa ku nos kurpa, sino riba fe den e kapasidat i deseo di Dios pa kumpli ku su promesanan. (Echo. 24:15) Kisas nos no ta komprondé kompletamente kon Dios a hasi e milager di resurekshon den pasado òf kon lo e hasi esei den futuro. Sinembargo, nos ta pone nos konfiansa den Yehova, kende a duna nos “un garantia” ora el a resusitá Hesus.—Echo. 17:31; Luk. 24:2, 3.

Ora kristiannan tin ku disidí kiko pa hasi ku e kurpa di nan defuntu, ta bon pa nan tene kuenta ku kustumbernan lokal, sintimentu di hende i tambe e rekisitonan legal. (2 Kor. 6:3, 4) Ta keda na e persona mes òf su famia pa disidí si mester krema su kurpa despues ku e fayesé òf nò.