TÓPIKO PRINSIPAL | TESTIGUNAN DI YEHOVA
Kiko Testigunan di Yehova ta kere aden?
Testigunan di Yehova ta kere ku “henter e Skritura ta inspirá di Dios i ta probechoso.” (2 Timoteo 3:16) P’esei nos ta usa Beibel komo un guia práktiko pa yuda nos konosé e Kreador i pa nos por tin un propósito den bida.
Beibel ta bisa: “Bo ta digno, Yehova, nos Dios, di risibí alabansa pa bo gloria, onor i poder.” (Revelashon 4:11) P’esei, komo su Testigunan, nos ta adorá Yehova Dios so i ta hasi esfuerso pa yuda hende konosé su nòmber.—Isaías 43:10-12.
Komo kristian, nos ta kere ku Hesus, esta, “e Yu di Dios,”a a bini na mundu i a bira e Mesías. (Huan 1:34, 41; 4:25, 26) Despues ku Hesus a muri, el a ser resusitá pa bai biba den shelu. (1 Korintionan 15:3, 4) I ku tempu el a bira Rei di e Reino di Dios. (Revelashon 11:15) E Reino ei ta un gobièrnu real ku lo hasi e tera un paradeis. (Daniel 2:44) Beibel ta bisa: “E humildenan lo heredá e tera, i lo deleitá nan mes den pas abundante.”—Salmo 37:11, 29.
“Ora nan ta lesa Beibel, pa nan, ta komo si fuera ta Dios ta papia ku nan. Ki ora ku un problema presentá den nan bida, nan ta buska un solushon den e Palabra di Dios. . . . Pa nan, ainda e Palabra di Dios ta bibu.”—Benjamin Cherayath, un pastor katóliko, Korant Münsterländische Volkszeitung, Alemania
Ademas, Testigunan di Yehova ta kere ku prinsipionan di Beibel por yuda hende den nos tempu tambe. (Isaías 48:17, 18) P’esei nos ta pega na prinsipio bíbliko den nos bida. Por ehèmpel, nos no ta huma ni usa droga, pasobra Beibel ta spièrta nos kontra bisionan ku ta kontaminá kurpa i mente di hende. (2 Korintionan 7:1) Ademas, nos ta evitá práktika ku Beibel ta kondena spesífikamente, manera bebementu di mas, inmoralidat seksual i hòrtamentu.—1 Korintionan 6:9-11.
a Tambe Beibel ta yama Hesus “e Yu unigénito di Dios” pasobra Yehova a krea Hesus promé, i e ta e úniko ku Yehova a krea direktamente.—Huan 3:18; Kolosensenan 1:13-15.