Pregunta di Lektor

Ken tabata e Benefaktornan ku Hesus a papia di dje riba e anochi promé ku su morto, i pakiko Hesus a duna nan e título akí?

Riba e anochi promé ku Hesus su morto, el a konsehá su apòstelnan pa no purba di haña mas prestigio i poder ku nan rumannan den fe. El a bisa nan: “E nashonnan tin reinan ku ta dominá nan. I esnan ku tin outoridat riba e nashonnan ta ser halsá komo Benefaktor. Ma boso no mester ta asina.”—Luk. 22:25, 26.

Ken tabata e Benefaktornan ku Hesus a referí na dje? Algun inskripshon, moneda i loke a ser skirbí den e tempu ei ta mustra ku e griegonan i e romanonan tabatin kustumber di onra sierto hòmber prominente i gobernante, dunando nan e título Euergetes (Evergetes), òf Benefaktor. E hòmbernan akí tabata risibí onor pasobra nan a hasi algu ku a benefisiá nan komunidat.

Vários rei tabatin e título Benefaktor. Entre nan, tabatin e gobernantenan egipsio konosí komo Tolomeo III Evergetes (rònt di aña 247-222 P.K.) i Tolomeo VIII Evergetes II (rònt di aña 147-117 P.K.). Gobernante romano Julio Cesar (aña 48-44 P.K.) i Ougusto (aña 31 P.K.-14 D.K.) tambe a haña e título akí. Heródes e Grandi, rei di Hudea, tambe tabatin e título akí. Probablemente, Heródes a haña e título akí debí ku el a perkurá paña pa e hendenan den nesesidat i a importá trigu pa aliviá e hamber ku tabata reina entre su pueblo.

Segun Adolf Deissmann, un eksperto aleman riba tereno di Beibel, e título Benefaktor tabata hopi usá. El a bisa: “Lo a tuma masha poko tempu pa lokalisá sientos di ehèmpel [di e uso di e título akí],den e inskripshonnan di e tempu ei.”

Pues, kiko Hesus tabata ke men ora el a bisa su disipelnan: “Ma boso no mester ta asina”? Akaso Hesus tabata bisa su disipelnan ku nan no mester a mustra interes den e bienestar di nan paisanonan? Sigur ku nò! Loke tabata preokupá Hesus tabata e motivashon tras di nan generosidat.

Den tempu di Hesus, e hendenan riku tabata finansiá diferente espektákulo, wega den arena, konstrukshon di parke i tèmpel, i otro aktividat similar pa haña un bon reputashon. Sinembargo, nan tabata hasi esaki djis pa nan haña mas elogio, popularidat òf voto. Un obra di referensia ta bisa: “Aunke tabatin algun ehèmpel di berdadero generosidat, hopi biaha e motivashon tras di e práktikanan akí tabata pa interes personal.” Pues, Hesus tabata ke pa su siguidónan evitá e tipo di ambishon i egoismo ei.

Algun aña despues, apòstel Pablo a bolbe enfatisá e importansia di tin e motivashon korekto ora di duna. Den su karta na e rumannan di Korinto, el a bisa: “Laga kada hende hasi manera el a disidí den su kurason, no di mala gana, ni fòrsá, pasobra Dios ta stima hende ku ta duna ku alegria.”—2 Kor. 9:7.