Morto Ta un Realidat Tristu

IMAGINÁ ku bo ta wak un pelíkula di un mucha muhé famoso; laga nos bisa di un músiko ku bo ta atmirá. E pelíkula ta kuminsá tempu ku e tabata chikitu. Bo ta mira kon e ta bai lès di muzik i ta praktiká masha hopi mes. Despues bo ta mir’é ta duna konsierto, biaha rònt mundu i haña fama internashonal. No ta dura hopi ku e ta bira bieu i, na final di e pelíkula, e ta muri.

Esaki ta un relato real di un persona ku ya no ta eksistí mas. No ta importá si e tabata un artista, un sientífiko, un atleta òf kualke otro persona famoso. Básikamente e relato lo ta meskos. Kisas e persona a logra hopi kos durante su bida, pero probablemente bo ta puntra bo mes ta kuantu mas lo e por a logra si e no a bira bieu i muri.

Lamentablemente, esei ta loke ta spera nos tur. (Eklesiástes 9:5) Ni maske kiko nos hasi, nos no por logra skapa di behes i morto. No esei so, diripiente nos por pèrdè nos bida pa motibu di un malesa kruel òf un aksidente. Ta manera Beibel ta bisa, nos ta manera neblina ku “ta aparesé pa un ratu i despues ta disparsé.”—Santiago 4:14.

Komo ku nos por muri na kualke momento, algun hende ta pensa: “Laga nos kome i bebe, pasobra mañan nos ta muri.” (1 Korintionan 15:32) Pero bo no ta di akuerdo ku hopi hende ta biba asina pasobra nan no tin speransa pa futuro i pasobra nan sa ku nan por muri kualke momento? Nos tur, tardi òf trempan, kisas lo hasi nos mes e pregunta: Esaki ta e propósito di bida? Nos lo hasi e pregunta ei spesialmente ora nos ta pasa den un situashon ku ta kousa nos hopi doló. Awor, unda nos por haña kontesta pa e pregunta ei?

Hopi hende ta pensa ku siensia tin e kontesta. Progreso riba tereno médiko i sientífiko a hasi posibel ku nos por biba mas largu. I algun sientífiko ta buska manera pa nos por biba mas largu ainda. Sea ku nan ta logra esei òf nò, e preguntanan akí ta keda: Dikon nos ta bira bieu i muri? Tin speransa ku algun dia nos enemigu morto lo no t’ei mas? E siguiente artíkulonan lo analisá e tópikonan akí i kontestá e pregunta: Esaki ta e propósito di bida?