Caha Di Pregunta

◼ Ta apropiado pa contribuí pa transporte cu otro rumannan ta percurá?

Algun di nos tin circunstancianan cu ta rekerí pa nos dependé riba otro rumannan pa yuda nos asistí regularmente na e reunionnan i participá den sirbishi di veld. Hopi ruman bondadosamente ta haci un esfuerso special i amorosamente ta usa nan tempu, auto i otro recursonan pa percurá transporte pa nos. Aunke tal bes nan tin cu prepará mas trempan cu normal i nan ta tarda pa yega cas bek, nan ta percurá e transporte cu un spiritu dispuesto.

Mescos cu den tur otro aspecto di nos ministerio cristian, e principio hañá na Galationan 6:5 ta aplicá: “Cada un lo hiba su mes carga.” P’esei, si un persona regularmente ta percurá transporte pa nos, nos mester demostrá nos aprecio no solamente mediante nos palabranan sino tambe, si ta posibel, mediante un contribucion razonabel pa yuda cubri e gastunan cu ta enbolbí.​—Mat. 7:​12; 1 Cor. 10:⁠24.

Asta si e persona cu ta usando su auto no ta pidi yudansa financiero i no ta parce di tin mester di tal yudansa, e oferta sincero di un contribucion semper ta ser apreciá. E shofer tal bes ta nenga di aceptá algu; i, naturalmente, t’e tin cu dicidí esei. Pero ta corecto pa abo haci e oferta. Si bo no por contribuí cu nada na e momento ei, bo por tene esei na mente; tal bes e siguiente biaha cu bo haña un lift lo bo por ofrecé algu extra.​—⁠Luc. 6:38.

Ta masha amoroso di esnan cu auto pa percurá transporte pa otro rumannan cu kisas di otro manera lo no por asistí na e reunionnan of participá den e ministerio di veld. (Pro. 3:27) Na mésun tempu, ta amoroso tambe pa esnan cu ta beneficiá di tal bondad expresá nan gradicimentu dor di contribuí segun nan circunstancia.​—⁠Col. 3:​15.