Kico di Bo Famianan?
1 Mayoria di nos tin vários famia cu no ta den e berdad. Nos ta anhelá intensamente pa tal sernan kerí djoin nos riba e caminda cu ta hiba na bida! Nos interes intenso pa nan futuro eterno por ta mas grandi ora nan ta miembronan di nos propio cas. Maske nos a purba pa añanan pa interesá nan den e berdad, nos no mester concluí cu e situacion ta sin speransa.
2 Tempu Jesus a predicá, “su rumannan, en realidad, no tabata ehercé fe den dje.” (Juan 7:5) Na dado momento, su famianan a pensa cu e tabata loco. (Mar. 3:21) Sin embargo, Jesus no a perde speransa pa nan. Cu tempu, su ruman hombernan a aceptá e berdad. (Echo. 1:14) Santiago, su mitar ruman, a bira un pilar den e congregacion cristian. (Gal. 1:18, 19; 2:9) Si bo tin gana di tin e goso di mira bo famianan aceptá e berdad, no stop di purba alcansá nan cu e bon nobo di Reino.
3 Sea Refrescante, No Aplastante: Ora Jesus a predicá na otronan, su oyentenan a sinti nan mes refrescá, no intimidá. (Mat. 11:28, 29) E no a inundá nan cu siñansanan cu nan no por a comprendé. Pa refrescá bo famianan cu e awanan di berdad, duna nan cada bes un kopi, no un hember yen! Un superintendente biahero a remarcá: “E mihó resultadonan ta ser lográ dor di esnan cu ta lanta curiosidad den nan famianan dor di duna testimonio den dósisnan chikitu i regular.” Den e manera aki, asta opositornan lo por cuminsá haci pregunta i cu tempu desaroyá un sed pa e berdad.—1 Ped. 2:2; compará cu 1 Corintionan 3:1, 2.
4 Hopi cristian casá a duna testimonio eficasmente na nan casá incrédulo dor di laga literatura habrí na informacion cu lo por interesá nan. Un ruman muher cu a haci esaki tambe a conducí un studio cu su yunan caminda su esposo por a tende, dunando splicacionnan cu lo a beneficiá e esposo. Tin biaha e tabata puntra e esposo: “Mi a siña tal i tal cos den mi studio awe. Kico abo ta pensa di esei?” Su esposo finalmente a aceptá e berdad.
5 Sea Respetuoso, No Impaciente: Un publicador a comentá cu “asta famianan tin e derecho di tin nan propio punto di bista i opinionnan.” Pues nos mester mustra respet ora nan expresá loke nan ta pensa of ora nan pidi nos specíficamente pa no papia cu nan tocante e berdad. (Ecl. 3:7; 1 Ped. 3:15) Dor di ta paciente i amoroso i dor di ta bon scuchador, nos por busca oportunidadnan apropiado pa duna un testimonio sutil. Tal pacenshi por ta recompensador, manera por a mira den e caso di un esposo cristian kende cu pacenshi a soportá e maltrato di su esposa incrédulo pa 20 aña largu. Asina cu e esposa a cuminsá cambia, e esposo a bisa: “Esta gradicidu mi ta na Jehova cu el a yudá mi cultivá gran pacenshi, pasobra awor mi por mira e resultado: Mi esposa a cuminsá cana riba e caminda di bida!”
6 Kico di bo famianan? Por ta cu dor di bo bon conducta cristian i bo oracionnan na nan fabor, bo “por gana nan pa Jehova.”—1 Ped. 3:1, 2, nota.