“Jehova Ta Mi Yudante”
1 Ora Jesus a comisioná su promé disipelnan, el a bisa nan: “Mira! Mi ta mandando boso manera carné meimei di lobo.” (Mat. 10:16) Esei a pone nan haña miedu i keda sin predicá? No. Nan a adoptá e actitud cu mas despues apostel Pablo a expresá ora el a bisa compañeronan cristian: “Tene bon ánimo i bisa: ‘Jehova ta mi yudante; lo mi no tin miedu. Kico hende por hací mi?’ ” (Heb. 13:6) Nan a alegrá di ta contá digno di ser desonrá pa causa dje nomber di Jesus, i nan a sigui siña i declará e bon nobo sin stop.—Echo. 5:41, 42.
2 Awe e predicacion mundial ta den su fase final. Net manera Jesus a pronosticá, nos a bira obheto di odio di parti di tur nacion. (Mat. 24:9) Hende a oponé i ridiculisá nos trabou di predicá, i den algun parti dje tera, asta el a ser prohibí. Si nos tabata falta fe, nos lo por a sinti nos intimidá. Sin embargo, sabiendo cu Jehova ta nos Yudante, ta refrescá nos i ta fortalecé nos pa perseverá.
3 Curashi ta e cualidad di ta fuerte, intrépido i balente. E ta lo contrario di miedu, timides, cobardia. E disipelnan di Jesus semper tabatin mester di curashi pa perseverá. E ta esencial si nos kier evitá di ser desanimá dor dje actitud i accionnan di un mundu cu ta na enemistad cu Dios. Ki animante ta pa nos pensa riba e excelente ehempel di Jesus, un vencedor di mundu! (Juan 16:33) Corda tambe, e apostelnan cu, enfrentá cu pruebanan severo, a declará yen di curashi: “Nos tin cu obedecé Dios como gobernante mas bien cu hende.”—Echo. 5:29.
4 Nos No Ta e Sorto cu Ta Hala Atras: Nos mester haci esfuerso pa mantené un actitud positivo pa cu nos trabou. (Heb. 10:39) Semper tene na mente cu Jehova ta manda nos como un expresion di su amor i misericordia pa cu henter humanidad. Nunca e ta pidi su sirbidónan haci algu cu no ta sirbi un propósito útil. Tur cos cu nos ta asigná pa haci al final lo ta pa e bienestar di esnan cu ta stima Dios.—Rom. 8:28.
5 Un punto di bista optimista lo yuda nos sigui busca hende mansu manera carné den nos teritorio. Nos lo por mira e apatia cu hendenan ta desplegá como un expresion di nan frustracion i desesperacion. Laga nos amor impulsá nos pa ta comprensivo i paciente. Cada biaha cu nos laga literatura of detectá un chispa di interes, nos meta mester ta pa haci un rebishita unbes i stimulá mas interes. Nunca nos mester duda di nos abilidad di cuminsá un studio di Bijbel of di ta eficas den conducié. Mas bien, constantemente i cu oracion nos mester busca Jehova su yudansa i guia, teniendo confiansa cu lo e yuda nos.
6 Nos ta kere firmemente cu Jehova lo soru p’e trabou sigui te ora ta cla. (Compará cu Filipensenan 1:6.) Nos confiansa total den dje como nos Yudante ta fortalecé nos, di manera cu nos ‘no ta entregá den haci loke ta excelente.’—Gal. 6:9.