Nos Tur Mester Yuda pa Terminá e Trabou
1 Tur disipel di Jesucristo mester comprendé cu nan esfuerso pa apoyá i participá den e trabou di predicá e Reino ta masha importante. Jesus tabata sa cu su disipelnan lo a producí fruta di Reino na diferente cantidad. (Mat. 13:23) Aunke un gran parti dje actividad di predicá ta ser efectuá dor di hopi pionero diligente, nos tin cu encomendá tur cu ta sigui glorificá Dios yen di celo dor di carga mas tantu fruta posibel.—Juan 15:8.
2 Esfuerso Colectivo Ta Logra Hopi: Jesus a profetisá cu e esfuerso combiná di tur su disipelnan lo a producí obranan mas grandi cu di dje. (Juan 14:12) Sea cu nos circunstancia personal ta limitá loke nos por haci of e ta permití nos dedicá hopi tempu na predicá e Reino, nos tur mester yuda pa logra terminá e trabou. Ta manera Pablo a declará: “Henter e curpa, dor cu e ta armoniosamente uní huntu i ta trahá pa cooperá mediante tur djoint cu ta duna loke ta necesario, segun e funcionamentu di cada miembro respectivo n’e debido midí, ta contribuí n’e crecementu dje curpa.”—Efe. 4:16.
3 Kisas algun ruman ta sinti cu nan aporte no ta yuda cu masha cos. Sin embargo, pa Jehova e cos importante ta cu nos sirbishi ta di henter alma. Tur loke nos haci p’e ta balioso i ta ser apreciá.—Compará cu Lucas 21:1-4.
4 Sigui Apoyá e Trabou: Nos tur tin e privilegio di contribuí materialmente n’e trabou mundial. Algun ruman por yuda tambe cu e trabou físico enbolbí den apoyá e trabou di Reino. Nos cada un por haci esfuerso pa duna comentario bon prepará na reunion i participá den e Scol di Ministerio Teocrático. Dor di probechá di oportunidadnan pa stimulá otro rumannan, nos ta haci un contribucion balioso n’e spiritualidad dje congregacion, i esaki ta mehorá e congregacion su abilidad di efectuá e trabou confiá na dje.
5 Sí, nos tur mester yuda pa terminá e trabou. Ningun hende mester sinti cu e por keda afó numa. Nos esfuersonan combiná, tantu grandi como chikitu, den sirbi Jehova ta distinguí nos como e único berdadero adoradónan di Dios. (Mal. 3:18) Cada un di nos por tin un parti significativo den onra Jehova i den yuda otro hende siña conoc’é i sirbié.