Pidi Jehova Su Yudansa den Oracion
1 Jesus a inculcá den su disipelnan cu nan tin mester di Jehova su bendicion riba nan ministerio. (Mat. 9:37, 38) Nos oracionnan sincero di alabansa i gradicimentu huntu cu nos peticion i súplicanan ferviente, ta demostrá cu nos ta dependé completamente riba Jehova pa su yudansa. (Fil. 4:6, 7) E Scritura ta urgi nos pa sigui haci oracion cu “tur forma di oracion i súplica,” i esaki ta aplicá na nos oracionnan relacioná cu e ministerio.—Efe. 6:18.
2 Den oracion, nos ta alabá Jehova pa su cualidad i logronan inigualabel. Tambe nos ta alab’é como e Dunador dje bon nobo cu nos ta predicá. E ta merecé nos alabansa, pasobra ta e so ta haci nos ministerio un éxito.—Sal. 127:1.
3 Nos oracionnan di gradicimentu ta expresá aprecio pa e comprendimentu cu Jehova a duna nos tocante su boluntad i propósito. No ta un privilegio cu nos por compartí e berdadnan di Reino cu otro hende? Nos ta gradicí Jehova pa tur loke nos ta logra den e ministerio.—Sal. 107:8; Efe. 5:20.
4 Ta masha na su lugá pa nos pidi Jehova yuda nos haña hende cu lo aceptá nos oferta pa studia Bijbel, i nos ta pidié yuda nos yega na nan curason cu e berdad. Dor di haci peticionnan asina, nos ta reconocé cu ta Dios so por haci nos trabou den e ministerio un trabou productivo.—1 Cor. 3:5-7.
5 Un ruman muher tabata sinti cu un señora riba su ruta di revista no tabata lesa E Toren di Vigilancia i Spierta! Como cu e no tabata kier a malgastá e revistanan precioso aki, el a pidi Jehova pa si e señora no ta lesa nan, lagu’e nenga nan. Ora e ruman a pasa e siguiente biaha, e casá dje señora a bisa: “Masha danki pa trece e revistanan aki regularmente. Mi ta lesa nan i ta ègt gusta nan.”
6 Cu ruego humilde i ferviente, nos por suplicá Jehova pa yuda nos trata cu apatia i bofon dje público i pa vence cualkier miedu di hende cu nos por tin, pa asina nos por sigui duna otro hende testimonio cu curashi. (Echo. 4:31) Si nos sigui haci oracion cu “tur forma di oracion i súplica” miéntras nos ta ocupá nos obedientemente cu nos sirbishi sagrado, nos por tin sigur di Jehova su yudansa.—1 Juan 3:22.