Bo Ta un Proclamadó di Reino Regular?
1 Nos tur a alegrá ora nos a haña sa cu islanan ABC a alcansá un máximo di tur tempu di 2.197 publicadó na april 1996. Di berdad esei tabata debí na un esfuerso uní i decididu! Evidentemente den e lunanan cu a sigui, algun dje publicadónan aki tabatin dificultad pa ta proclamadónan di Reino regular, pasobra e promedio mensual for di e tempu ei ta rond di 2.146 publicadó. Esaki ta indicá cu 1 di cada 42 publicadó no ta raportá participacion den e ministerio tur luna. Nos ta kere cu e siguiente animacion por yuda remediá e situacion.
2 Apreciá e Privilegio: Nos mester tin un aprecio profundo pa e privilegio di por compartí e bon nobo di Reino cu otronan. E actividad aki ta alegrá Jehova su curason i ta yuda hende di curason sincero siña conocé e caminda cu ta hiba na bida. (Pro. 27:11; 1 Tim. 4:16) Duna testimonio riba un base regular ta aumentá nos experencia den e ministerio i ta resultá den un sintimentu di goso i logro.
3 Raportá e Actividad: Tin ruman cu ta participá den sirbishi di veld ta neglishá di raportá nan actividad na tempu. Nunca nos no mester pensa cu nos esfuerso no ta bal pa yena riba raport. (Compará cu Marco 12:41-44.) No keda sin raportá loke nos a haci! Dor di tin na cas un sistema di nota nos oranan di sirbishi, por ehempel riba un calender, esei lo sirbi como un recordatorio constante pa yena un raport exacto asina cu fin di luna yega.
4 Duna e Yudansa Necesario: Kisas mester mehorá e areglonan local pa yuda esnan cu tin mester di yudansa pa nan por tin un participacion consistente den e ministerio. E secretario di congregacion i conductornan di studio di buki mester haci areglo pa publicadónan cu experencia duna un man. Si bo tin yu of studiante di Bijbel cu ta publicadó no-bautisá, entrená nan pa raportá nan actividad tur luna.
5 Corda e historia di bida “Gradicidu pa un Bida Largu den e Sirbishi di Jehova,” cu a sali den e Toren di Vigilancia di 1 di october 1997. Ruman Ottilie Mydland di Norwega a bira un publicadó regular dje bon nobo promé cu el a bautisá na 1921. Setent’i seis aña despues, na edad di 99 aña, el a bisa: “Mi ta contentu cu ainda ta posibel pa mi ta un publicadó regular.” Esta un actitud maraviyoso cu ta bon pa tur sirbidó di Jehova imitá!