Haña Goso den Bo Sirbishi Sagrado
1 Nan a bolbe “cu goso.” Asina e relato bíblico ta expresá con e 70 disipelnan a sinti ora nan a raportá bek cerca Jesus, despues di un gira extenso di predicacion. Haci e boluntad di Dios a duna nan un sintimentu interno di deleite. (Luc. 10:17) Kico por yuda abo haña e mésun goso den sirbishi sagrado?
2 Un Actitud Positivo: Bo tin e privilegio cu Dios a duna di cera hende conocí cu Jehova su propósito magnífico. Mediante bo predicacion, bo por yuda libra un hende for dje prácticanan degradá dje mundu aki i dje cadenanan di religion falsu. Bo por ofrecé hende e speransa di bida den un mundu liber dje desunion cu ta rondoná nos awe. Pensa riba e goso cu Jehova ta sinti ora bo planta cu éxito simia dje berdad den un curason receptivo. Cu optimismo, pidi den oracion pa Dios su spiritu producí den bo e fruta di goso miéntras bo ta participá den e ministerio cu henter bo curason.
3 Entrenamentu Práctico: Nos a yega di compará e sesion di instruccion cu Jesus a tene cu su 70 disipelnan cu un Reunion di Sirbishi di tempu actual. Jesus a entrená nan di manera cu nan por a cumpli eficasmente cu nan ministerio. (Luc. 10:1-16) Awe e Reunion di Sirbishi ta entrená bo den maneranan pa abordá hende, con pa cuminsá combersacion i con pa cuminsá i conducí studio di Bijbel na cas. Dor di traha diligentemente i mehorá bo abilidad di predicá, lo bo ripará cu cualkier sintimentu incómodo of di no ta cualificá cu kisas bo tabatin, lo mengua i ser superá dor di confiansa i goso.
4 Enfocá Riba Futuro: Jesus a haña goso den su sirbishi sagrado apesar dje sufrimentunan cu el a soportá. Di con? Pasobra el a keda cu su bista bon enfocá riba e bendicionnan i privilegionan cu tabatin su dilanti. (Heb. 12:2) Abo por haci mescos dor di mantené bo mente i curason enfocá riba e nomber di Jehova i riba e bendicionnan cu lo bini den Dios su mundu nobo. Esaki lo agregá goso i nificacion na bo ministerio.
5 Rindi sirbishi sagrado na Jehova ta e privilegio di mas grandi cu bo por tin awe. Pues, lo bo por bisa: “Den haci bo boluntad, o mi Dios, mi tabatin deleite.”—Sal. 40:8.