Repaso di Scol di Ministerio Teocrático
Repaso cu buki cerá riba e material cu a ser tratá den asignacionnan den e Scol di Ministerio Teocrático p’e simannan di 1 di mei te cu 21 di augustus 2000. Usa un blachi separá pa skirbi contesta di mas tantu pregunta posibel den e tempu asigná.
[Nota: Durante e repaso skirbí, por usa solamente Bijbel pa contestá cualkier pregunta. E referencianan cu ta sigui e preguntanan ta pa bo investigacion personal. Number di página i paragraf kisas no ta aparecé na tur referencia di E Toren di Vigilancia.]
Contestá cada un dje siguiente declaracionnan cu Cierto of Falsu:
1. Gídeon su contesta riba e atake verbal inhustificá dje hombernan di Efraim, a reflehá su suavedad i humildad i dje manera ei a plakia nan crítica inhustu i a mantené pas. (Hues. 8:1-3) [1, Lesamentu semanal di Bijbel] Cierto.
2. Maske Manoa a bisa “ta Dios nos a mira,” en realidad e cu su casá a mira e bocero personal di Dios den un curpa materialisá, i no Jehova mes. (Hues. 13:22) [2, Lesamentu semanal di Bijbel; mira w88-S 15/5 pág. 23 §3.] Cierto.
3. Na Huesnan 5:31, e expresion “esnan cu stima bo” ta referí proféticamente na e 144.000 herederonan di Reino. [4, si-S pág. 50 §28] Cierto.
4. Hende no a haña ningun pida dje buki di Rut entre e Rolnan di Laman Morto. [5, si-S pág. 51 §3] Falsu. Nan a haña pidanan dje buki di Rut entre e Rolnan di Laman Morto.
5. Huesnan 21:25 ta referí na un periodo di tempu cu Jehova a laga e nacion di Israel sin ningun clase di guia. [4, Lesamentu semanal di Bijbel; mira w95-PA 15/6 pág. 22 §16.] Falsu. Tur stad den Israel tabatin ancianonan cu por a duna yudansa maduro pa trata pregunta i problema. Ademas, e sacerdotenan levítico a ehercé un bon influencia dor di educá hende den e ley di Dios. Ora asuntunan extra difícil a surgi, e sumo sacerdote por a consultá Dios mediante e Urim i Tumim.
6. E figuranan di kerubin riba e arca di pacto a indicá e presencia real di Jehova, kende Bijbel ta bisa ta “sintá riba [of, “entre”] e kerubinnan.” (1 Sam. 4:4, nota na pia di pág.) [7, Lesamentu semanal di Bijbel; mira w81-S 15/3 pág. 24 §4 (w80-E 1/11 pág. 29 §2).] Cierto.
7. E echo cu den un situacion desesperá Saul su soldánan a come sanger i no a ser castigá, a mustra cu por tin motibunan hustificá pa ignorá temporalmente ley divino pa salba bo bida. (1 Sam. 14:24-35) [9, Lesamentu semanal di Bijbel; mira w94-PA 15/4 pág. 31 §7-9.] Falsu. Ora Saul a realisá kico e soldánan a haci, el a tuma medida pa rectificá e situacion dilanti Dios. Tambe Jehova podisé a tuma na cuenta e huramentu descabeyá di Saul cu a contribuí na e situacion desesperá. (1 Sam. 14:24, 34, 35)
8. Maske algun hende ta asociá e palabra “persuasion” cu manipulacion i astucia, por us’é den un sentido positivo pa transmití e idea di convencé i trece un cambio di mente, mediante razonamentu sano i lógico. (2 Tim. 3:14, 15) [11, w98-PA 15/5 pág. 21 §4] Cierto.
9. “E sacu di bida” ta referí na un percuracion divino di protehá i conserbá, loke lo a beneficiá David si den bista di Dios el a evitá di ta culpabel di dramamentu di sanger. (1 Sam. 25:29) [13, Lesamentu semanal di Bijbel; mira w91-S 15/6 pág. 14 §3.] Cierto.
10. E pacto di Reino cerá cu David, cu 2 Samuel 7:16 ta referí na dje, a limitá e desendencia dje Simia cu lo a hiba n’e Mesías, i tabata un garantia legal cu un persona dje liña di David lo a bin pa goberná “te na tempu indefiní.” [16, Lesamentu semanal di Bijbel; mira w89-S 1/2 pág. 14 §21-2.] Cierto.
Contestá e siguiente preguntanan:
11. Ki siguransa Salmo 34:18 ta duna? [1, w98-PA 1/4 pág. 31 §2] Jehova ta cla i dispuesto pa sostené su sirbidónan ora nan tin cu trata cu depresion i ta sinti cu nan no bal nada.
12. Kico e echo cu Josef tabatin e bijnaam Barnabas ta indicá? (Echo. 4:36) [2, w98-PA 15/4 pág. 20 §3, nota na pia di pág.] Evidentemente e tabata un homber caluroso i compasivo. Barnabas kier men “Yu di Consuelo”; yama un hende “yu di” un cierto cualidad, a subrayá un característica sobresaliente dje persona ei.
13. Pakico e relato bíblico ta bisa cu Eli a sigui onra su yunan mas cu el a onra Jehova? (1 Sam. 2:12, 22-24, 29) [6, Lesamentu semanal di Bijbel; mira w96-PA 15/9 pág. 13 §14.] Como nan tata i sumo sacerdote di Israel, Eli tabatin e deber di disipliná su yunan, dor cu nan a cometé sacrilegio i inmoralidad grave, pero el a djis reprendé nan suavemente.
14. Di con e buki di Rut mester fortalecé nos confiansa den e promesanan di Reino? [5, si-S pág. 53 §10] Pasobra e buki ta mustra cu Jehova ta Esun cu a areglá e matrimonio entre Boaz i Rut i cu el a usa esei como un medio pa conserbá e liña real di Huda intacto, loke a hiba na David i finalmente na e David Mayor, Jesucristo.
15. Segun 1 Samuel 1:1-7, ki ehempel sobresaliente e famia di Samuel a pone? [6, Lesamentu semanal di Bijbel; mira w98-PA 1/3 pág. 16 §12.] Encabesá pa Elcana, tata di Samuel, henter e famia a participá regularmente den e areglonan pa reuní huntu cu compañeronan di adoracion na e tabernáculo na Silo.
16. Den ki sentido por ser bisá cu ‘e poder di rikesa ta engañoso’? (Mat. 13:22) [9, w98-PA 15/5 pág. 5 §1] Aunke por usa placa pa obtené cos material, e rikesanan ei no ta resultá den e satisfaccion ni felicidad cu esun cu ta adkerí nan ta verwagt di haña.
17. Con Jonatan cu tabata mas bieu, a mustra cu el a reconocé David como e ungí di Jehova, i kico esaki ta simbolisá awe? (1 Sam. 18:1, 3, 4) [11, Lesamentu semanal di Bijbel; mira w89-S 1/1 pág. 24, 26 §4, 13.] Mediante un pacto Jonatan a drenta den un amistad duradero cu David, i asina a indicá su amor i sumision na David. E amistad ei a simbolisá e relacion entre e “otro carnénan” i e resto di cristian ungí.
18. Aunke Job tabata “sin culpa i recto,” con e buki di Job ta indicá cu esaki no kier men cu e tabata perfecto? (Job 1:8) [8, w98-PA 1/5 pág. 31 §1] Job a kere ekibocadamente cu ta Dios tabata causa su calamidadnan, el a criticá Dios su manera di trata cu hende i a declará su mes husticia en bes di esun di Dios. (Job 27:2; 30:20, 21; 32:2)
19. Kico e expresion “haci esfuerso vigoroso” ta implicá? (Luc. 13:24) [16, w98-PA 15/6 pág. 31 §1, 4] E expresion ta implicá lucha, forsa nos mes, ser diligente i traha duru, no adorá Jehova cu un actitud sin entusiasmo.
20. Manera ta pará skirbí na 2 Samuel 12:26-28, ki les balioso nos por tuma na pechu ora nos ta traha huntu cu otro hende? [17, Lesamentu semanal di Bijbel; mira w93-PA 1/12 pág. 19 §19.] Nos mester ta dispuesto pa duna crédito na otro hende miéntras cu nos ta traha i keda for di centro di atencion público. Ta un indicacion di humildad si nos ta dispuesto pa haci esei.
Yena e palabra(nan) of frase necesario pa completá cada un dje siguiente declaracionnan:
21. E manera severo cu Jehova a condená adoracion di Baal mester impulsá nos pa keda leu for dje ekivalentenan moderno cu ta materialismo, nacionalismo i inmoralidad sexual. (Hues. 2:11-18) [4, si-S pág. 50 §26]
22. Tabata durante e dianan di Samuel cu e era di huesnan a yega na un fin i e era di reynan humano a cuminsá durante cua finalmente Israel a perde Jehova su fabor. [6, si-S pág. 53 §1]
23. E nomber divino, Jehova, ta nificá “E Ta Causa pa Bira” i ta implicá cu Jehova por cumpli cu cualkier papel cu ta necesario pa logra su propósitonan. [7, w98-PA 1/5 pág. 5 §3]
24. Eli cu Saul tur dos a fracasá; Eli, pasobra el a neglishá di actua, i Saul, pasobra el a actua cu arogancia. [14, si-S pág. 57 §27]
25. Jesus su comparacion dje bon samaritano ta mustra cu un persona berdaderamente recto ta unu cu no ta obedecé solamente e leynan di Dios, sino tambe ta imitá Dios su cualidadnan. (Luc. 10:29-37) [17, w98-PA 1/7 pág. 31 §2]
Scoge e contesta corecto den cada un dje siguiente declaracionnan:
26. Nos por mira con leu Jehova su cualidad di (sabiduria; poder; amor) ta bai den e echo cu el a scoge e moabita (Rut; Noemí; Orpa), un ex-adoradó di (Baal; Kémos; Dagon), cu a combertí na religion berdadero i a bira un antepasado di Jesucristo. (Mat. 1:3, 5, 16) [5, si-S pág. 51 §1]
27. Israel su era di gobernacion den man di hues a terminá ora (Samuel; David; Saul) a ser ungí como rey i djis despues a derotá e (amonitanan; moabitanan; filisteonan) cu e respaldo di Jehova. (1 Sam. 11:6, 11) [8, Lesamentu semanal di Bijbel; mira w95-PA 15/12 pág. 9 §2–pág. 10 §1.]
28. Tabata (apostel Pablo; su tata; su mama i su wela) cu a hiba delantera den educá Timoteo den e “scrituranan santu” te n’e punto di mir’é bira un excelente misionero i superintendente. (2 Tim. 3:14, 15; Fil. 2:19-22) [10, w98-PA 15/5 pág. 8 §3–pág. 9 §5]
29. (David; Samuel; Jonatan) su ministerio for di mucha mester animá hóbennan pa participá den e ministerio awe, i e echo cu el a sigui sin baha cu penshon te dia el a muri, mester sostené esnan cu ta cansá di behes. [14, si-S pág. 58 §30]
30. E periodo cu 2 Samuel ta abarcá ta di aña (1077 te rond di 1040; 1077 te rond di 1037; 1070 te rond di 1040) P.E.C. [15, si-S pág. 59 §3]
Cuadra e siguiente textonan bíblico cu e declaracionnan aki bou:
Hues. 11:30, 31; 1 Sam. 15:22; 30:24, 25; 2 Rey. 6:15-17; Sant. 5:11
31. Jehova ta duna e siguransa cu lo e usa su ehércitonan celestial pa protehá su pueblo segun su boluntad. [2 Rey. 6:15-17] [3, w98-PA 15/4 pág. 29 §5]
32. Superintendentenan di congregacion tin e responsabilidad di cumpli cu nan acuerdonan maske podisé esei tin biaha ta doloroso i costoso. [Hues. 11:30, 31] [2, w99-PA 15/9 pág. 10 §3-4]
33. Mantené integridad bou di prueba ta hiba na un recompensa grandi for di Jehova Dios. [Sant. 5:11] [8, w98-PA 1/5 pág. 31 §4]
34. Berdadero amor pa Dios ta rekerí pa nos obedecé instruccionnan divino i no simplemente ofrecé sacrificio na dje. [1 Sam. 15:22] [10, Lesamentu semanal di Bijbel; mira w96-PA 15/6 pág. 5 §1.]
35. Jehova ta demostrá aprecio profundo pa esnan cu ta haci nan parti den apoyá su organisacion awe. [1 Sam. 30:24, 25] [14, Lesamentu semanal di Bijbel; mira w86-S 1/9 pág. 28 §4.]