Bin Bishitá “e Cas di Dios”!
1 Bo a bishitá e facilidadnan dje Betel nobo na Kòrsou caba? Durante e mas cu un aña i mei cu a pasa desde cu a cuminsá usa e facilidadnan nobo, cientos di ruman a bishit’é, i hopi di nan como grupo di studio di buki.—Sal. 55:14.
2 Bishitá casnan di Betel ta hopi bes un ocasion sobresaliente di nos actividad teocrático. Pa e famia di Betel na Kòrsou ta semper un placer pa yama bo bon biní na Betel. Kico Betel ta, i ki trabou ta ser hací einan?
3 Kico Betel Ta? E ta un di e 110 sucursalnan rond mundu cu ta funcioná bou di direccion dje sede mundial ubicá na Brooklyn, New York. E compleho di edificio na Kòrsou ta conocí como Betel, cu ta nificá “Cas di Dios.” E nomber bíblico aki ta pas. Di con? Pasobra e 14 boluntarionan cu actualmente ta biba i traha einan ta ministernan ordená cu a dedicá nan mes na Jehova i a pone nan mes pa sirbi di tempu completo den promové e trabou di predicacion di Reino den nos teritorio.
4 E famia di Betel cu a cuminsá crece durante fin di añanan ’90 a bira muchu hopi pa e facilidad cu tabatin na Oosterbeekstraat 11, na Kòrsou. P’esei a bira necesario pa Sociedad adkerí un otro propiedad i trasladá e actividadnan di sucursal cu pa hopi aña a tuma lugá na Oosterbeekstraat 11, pa e lugá nobo.
5 Na december 1998, nos a cumpra e propiedad nobo di sucursal situá na Seroe Loraweg 142A, Kòrsou. Di mart pa juli 1999 un renobacion grandi a tuma lugá, pa combertí e compleho di hotel den un edificio cu por a facilitá funcionamentu di un sucursal. E mudansa final a tuma lugá na juli 1999.
6 Edificio di Oficina: Na sucursal e departamento central ta e Departamento di Traduccion. Debí na e trabou cu ta ser hací einan, nos ta disfrutá di edicionnan simultáneo dje revista Toren di Vigilancia na papiamento, i edicionnan mensual di Spierta! E Comité di Redaccion dje Cuerpo Gobernante ta sigui suministrá e departamento aki cu informacion i recomendacionnan relacioná cu e trabou di traducí na papiamento.
7 Den e mésun edificio tin e comedor i cushina dje famia di Betel. Te cu 30 persona por sinta den e comedor i disfrutá huntu di programanan spiritual i cuminda.
8 Na otro banda dje patio tin un shop chikitu di mantenimentu cu ta facilitá reparacion i ei tambe ta traha mueblenan chikitu of atendé otro trabounan cu surgi. Ta masha importante pa organisá e mantenimentu dje facilidadnan di Betel.
9 Cuido dje Famia: Miembronan di famia di Betel ta ricibí alohamentu i cuminda i un zakgeld mensual chikitu pa yuda nan cubri nan gastunan. Ademas, tin vários departamento cu ta efectuá servicionan vital en coneccion cu cuido dje famia di Betel.
10 Algun dje boluntarionan di Betel den e departamento di limpiesa ta soru pa mantené e facilidadnan limpi. E amanan di yabi ta purba mantené un norma haltu di limpiesa, loke ta un rasgo cu ta distinguí casnan di Betel rond mundu.
11 Un biaha pa siman miembronan di famia di Betel por manda nan pañanan n’e labanderia. Nos ta usa tres wasmashin i dos ‘dryer’ pa laba e pañanan di nos famia di 14 persona.
12 Programanan Spiritual: Cada miembro dje famia di Betel ta participá cu regularidad den studio personal di Bijbel i den vários programa di educacion spiritual. P’e famia di Betel por tin felicidad i contentamentu ta esencial pa nan keda spiritualmente fuerte.
13 Tur ruman invitá pa sirbi na Betel ta asistí na e Scol di Admision na Betel. Esaki ta un programa di studio diseñá pa yuda personanan progresá den nan conocimentu bíblico i ahustá na e ambiente di Betel. Ademas, ta ser rekerí di cada miembro nobo pa nan lesa e Bijbel completo durante nan promé aña di sirbishi di Betel.
14 Tur mainta di trabou e famia di Betel ta reuní huntu na mesa di desayuno pa considerá un texto bíblico for di Examinando e Scritura diariamente. Tin un presidente asigná pa dirigí e consideracion di 15 minuut aki, i ta asigná miembronan di famia pa comentá riba e texto bíblico. Despues dje consideracion, e famia ta haci oracion, caba ta sirbi desayuno. Casi na fin dje ora di desayuno, e famia ta disfrutá dje lesamentu di sea un porcion di Bijbel of dje Anuario coriente.
15 Riba dialuna anochi henter e famia di Betel ta reuní huntu pa studia Bijbel cu yudansa di E Toren di Vigilancia i pa scucha otro programanan special.
16 Cada boluntario di Betel ta traha cu un congregacion local. Tur ta participá den e predicacion di Reino i den otro actividadnan di congregacion, i algun ta sirbi como anciano of sirbidó ministerial.
17 Conclusion: Nos ta spera sinceramente cu lo bo haci esfuerso pa pronto bishitá e Betel dje sucursal di Kòrsou. Sigur lo bo haña esei un experencia recompensador. Sin duda esei lo yuda bo pa cera conocí mihó cu e trabou cu ta ser hací pa yuda hende den nan búskeda di un mihó futuro mediante e Reino di Dios.—Mat. 28:19, 20.
18 Jehova lo bendicioná nos ora nos realisá cu nos tur ta colaboradó dje trahadónan dje sucursal local. E famia di Betel di Kòrsou ta anticipá di mira mas di boso pronto.—Echo. 15:36.