Nos Tin un Herment Nobo pa Cuminsá Studio!
1 E señora mericano tabata un católico romano deboto. El a defendé e doctrinanan di iglesia fielmente. Asta el a yega di haci un peregrinacion pa Vaticano. I tog, ora un Testigo di Jehova a yama na su porta, el a aceptá e oferta di un studio di Bijbel na cas. Di con? Pasobra e kier a sa kico Bijbel ta bisa, i su religion no tabata duna studio di Bijbel na cas. Kico e experencia aki ta siña nos? Cu nos no sa nunca ken probablemente lo aceptá un studio grátis di Bijbel.—Ecl. 11:6.
2 Bo a yega di vacilá pa bisa hende cu nos ta dispuesto pa studia Bijbel cu ken cu ta interesá? Tur hende den bo bario sa cu nos ta ofrecé e servicio grátis aki? Con nos por haci sigur cu nan ta haña sa? Dor di haci uso di un herment nobo! Un bunita tratado di seis página, titulá Lo Bo Kier Sa Mas Tocante Bijbel? Laga nos cera conocí cu e tratado aki, di subtema pa subtema.
3 “Pakico Lesa Bijbel?” E motibunan cu e tratado ta duna ta masha interesante. E ta splica cu Bijbel ta contené “instruccion amoroso for di Dios,” instruccion cu ta mustra con pa acercá Dios den oracion pa haña yudansa i con pa ricibí su regalo di bida eterno. (1 Tes. 2:13) E tratado ta referí na vários ‘berdad den Bijbel cu ta clarificá hopi asuntu,’ manera kico ta sosodé despues cu nos muri i di con tin asina tantu problema riba tera. Tambe e tratado ta describí “principionan divino den Bijbel” cu ta trece beneficionan físico i ta contribuí na felicidad, speransa i otro cualidadnan deseabel ora nos pone nan na práctica. E tratado ta referí na un motibu mas pa lesa Bijbel: e profecianan tocante futuro cu ta mustra kico tin djis nos dilanti.—Rev. 21:3, 4.
4 “Yudansa pa Comprendé Bijbel”: E tratado ta bisa: “Nos tur tin mester di yudansa pa comprendé e Palabra di Dios.” Anto e ta describí e método cu nos ta usa pa studia Bijbel: “Por lo general ta mihó pa studia Bijbel gradualmente, cuminsando cu siñansanan básico.” Aunke e tratado ta splica bon cla cu “Bijbel ta é autoridad,” e ta mencioná e foyeto Rekerí specíficamente como un medio cu por yuda e studiante “comprendé pasashinan bíblico cu ta trata cu vários tópico.” E siguiente subtema ta plantia un pregunta cu ta pone hende pensa.
5 “Bo Ta Dispuesto pa Dedicá Tempu Tur Siman pa Comprendé Bijbel?” E tratado ta splica cu por haci areglo pa tene e studio di Bijbel na un ora i lugá cu ta cumbiní e studiante, sea den e privacidad di su mes cas of asta via telefon. Ken por participá den e studio? E tratado ta contestá: “Henter bo famia. Cualkier amigu cu bo kier invitá tambe por participá. Of si bo ta preferá, por haci e consideracion cu bo so.” Pa cuantu tempu un hende tin cu studia? E ta splica: “Hopi hende ta apartá un ora tur siman pa studia Bijbel. Asta si bo por studia mas tempu of ménos tempu pa siman, e Testigonan lo ta dispuesto pa yuda bo.” Esei ta e clave! Nos ta dispuesto pa adaptá na e circunstancianan di cada studiante.
6 “Un Invitacion pa Siña”: E tratado tin un cupon cu e persona cu ricibí e tratado por yena pa pidi e foyeto Rekerí of un bishita p’e haña splicacion di nos programa di studio di Bijbel grátis na cas. Tin un plachi na color dje portada dje foyeto Rekerí. Bo por mira di con e tratado aki lo animá mas hende di curason onrado pa aceptá nos yudansa? Awor, con nos por haci e mihó uso dje herment nobo aki?
7 Ken Bo Por Ofrecé e Tratado? Por entregá e tratado nobo na hende den nan man of por lagu’é ora no haña hende na cas. Por partié di cas pa cas, riba caya i den teritorio di negoshi. Ofrec’é na tur hende, sea cu nan aceptá nos literatura of no. Hink’é den revista of otro publicacion cu nos laga. Pone e tratado huntu cu carta cu nos skirbi. Ofrecé hende cu bo haña contacto cuné via telefon pa post e pa nan. Semper soru pa bo tin tratado cu bo por laga ora bo bai haci cómpras, ora bo usa transporte público i ora bo duna testimonio informal. Dun’é na ken cu yama na bo porta. Ofrec’é na famia, bisiña, colega, compañero di scol i otro conocínan. Haci esfuerso pa pone e tratado aki den man di tur hende cu bo topa! Anto kico despues?
8 Si e Persona Reaccioná Mesora: Tin hende lo reaccioná mesora i bisa cu nan lo kier un studio di Bijbel. P’esei, ki ora cu bo ta den sirbishi di veld, haci sigur cu bo tin dos ehemplar dje foyeto Rekerí: un pa e studiante i un pa bo mes. Si e persona ta dispuesto, cuminsá e studio mesora. Bai na página 2 i lesa “Con pa Usa e Foyeto Aki.” Anto caba bai direct na Les 1, i demostrá con e studio ta bai. Lo por tin algu mas fácil cu e sistema aki?
9 Si Bo Oyente Tin Mester di Tempu pa Pensa: Promé cu muchu tempu pasa, haci esfuerso pa bolbe haña contacto cu e persona. Ora bo haci esei, soru pa bo tin e foyeto Rekerí huntu cu bo. Mustr’é e contenido na página 2. Lagu’e scoge e tema cu e ta haña mas interesante. Bai n’e les cu el a scoge i cuminsá consider’é.
10 Haci Rebishita Caminda Bo A Laga Revista: Si bo a laga e tratado huntu cu un par di revista, kisas bo por bolbe bek i usa e introduccion aki: “Último biaha cu mi a pasa mi a keda contentu di por a laga E Toren di Vigilancia cerca bo. Kisas bo a ripará cu e título completo dje revista ta E Toren di Vigilancia Anunciando e Reino di Jehova Dios. Awe lo mi kier splica bo kico e Reino aki ta i kico lo e nificá pa bo i bo famia.” Anto habri e foyeto Rekerí na les 6. Cuminsando cu e promé paragraf, lesa i trata e les te caminda e tempu dje doño di cas permití. Caba, haci areglo pa bolbe un otro dia i terminá e les.
11 No Laga Bo Tratadonan Caba: E superintendente di sirbishi i e ruman encargá cu stock di literatura lo mester soru pa tur momento e congregacion tin un bon stock dje tratado Sa Mas Tocante Bijbel. Warda algun den bo sacu of tas, den bo auto, na trabou, na scol, na cas banda di porta, enfin tur caminda cu lo ta bon pa tin nan. Claro cu ta bon pa cana cu algun den bo tas di sirbishi pa ora bo topa un persona cu bo por combersá cuné tocante Bijbel.
12 Jehova Ta Bendicioná Nos Esfuerso: Un meta cu tur cristian kier logra ta di por siña e berdad na un otro persona. (Mat. 28:19, 20) Bo ta conduciendo un studio di Bijbel actualmente? Si ta asina, lo bo por saca tempu pa un studio mas den bo programa semanal? Si bo no ta conduciendo un studio, sigur lo bo kier tin unu. Resa pidi Jehova bendicioná bo esfuerso pa haña un persona cu ken bo por studia. Anto traha na armonia cu e oracionnan ei.—1 Juan 5:14, 15.
13 Pues nos tin un herment nobo pa cuminsá studio! Familiarisá bo mes cuné. Partié libremente. Haci tur loke ta na bo alcanse “pa obra loke ta bon, pa ta ricu den obranan excelente, pa ta generoso, cla pa compartí” loke bo a siña tocante e Palabra di Dios.—1 Tim. 6:18.
[Box on page 4]
OPORTUNIDADNAN PA PARTI E TRATADO
◼ Combersacionnan diario
◼ Ora un persona aceptá literatura
◼ Ora no tin niun hende na cas
◼ Ora nos haci rebishita
◼ Ora nos topa un persona durante predicacion riba caya
◼ Ora nos ta predicá den teritorio di negoshi
◼ Ora nos ta duna testimonio informal
◼ Ora nos skirbi carta
◼ Ora nos ta usa transporte público
◼ Ora un persona yama na nos porta
◼ Ora nos ta papia cu famia, bisiña, colega, compañero di scol i otro conocínan