Nos Fe Ta Motivá Nos pa Hasi Bon Obra
1 Fe a pone Noe, Moises i Rahab tuma akshon. Noe a traha e arka. Moises a bandoná e benefisionan pasahero di biba den palasio di Fárao. Rahab a skonde e spionnan i despues a obedesé nan instrukshon, i asina salba su hendenan di kas. (Heb. 11:7, 24-26, 31) Kua bon obra nos fe ta motivá nos pa produsí awe?
2 Prediká: Fe ta motivá nos pa papia tokante nos Dios maravioso i tokante e areglonan ku el a hasi pa hende haña felisidat eterno. (2 Kor. 4:13) Tòg tin biaha nos por vasilá pa duna testimonio. Pero ora nos ta ‘pone Yehova semper nos dilanti,’ nos ta bira mas fuerte i nos miedu ta mengua. (Sal. 16:8) E ora ei nos fe ta motivá nos pa kompartí e bon nobo ku famia, bisiña, kolega di trabou òf kompañero di skol i ku otro hende na tur okashon apropiado.—Rom. 1:14-16.
3 Reuní Huntu: Asistensia regular na reunion ta un otro bon obra ku ta originá di fe. Kon asina? Ora nos ta asistí regularmente na reunionnan kristian esei ta mustra ku nos ta konvensí ku Hesus t’ei presente huntu ku nos mediante Dios su spiritu santu. (Mat. 18:20) Esei ta demostrá ku nos tin deseo pa “tende loke e spiritu ta bisa e iglesianan.” (Rev. 3:6) Nos ta hasi kaso di e instrukshon ku nos ta haña pasobra nos fe ta yuda nos komprendé ku esun ku ta siña nos ta nos Magnífiko Instruktor, Yehova.—Isa. 30:20, NW.
4 Desishonnan Ku Nos Ta Tuma: E echo ku nos ta firmemente konvensí di realidatnan ku hende no ta mira, ta motivá nos pa duna asuntunan spiritual prioridat den nos bida. (Heb. 11:1) Hopi bes esaki ta enserá ku nos mester sakrifiká kosnan material. Por ehèmpel, un ansiano a keda sin aseptá e oportunidat di subi di posishon na su trabou pasobra esei lo a nifiká ku e tin ku falta reunion, stòp di traha pionero i lo no por ta huntu ku su famia. Laga nos tambe pone pleno konfiansa den e garantia ku Beibel ta duna ku Yehova lo perkurá sosten pa esun ku sigui “buska promé e reino di Dios i su hustisia.”—Mat. 6:33.
5 Hende lo no keda sin ripará e influensia poderoso ku fe tin riba nos bida. Sí, nos fe ta konosí rònt mundu. (Rom. 1:8) P’esei laga nos tur demostrá via nos bon obranan ku nos fe ta bibu.—Sant. 2:26.