“Sembrando Simia di Reino” ku un Ruta di Revista
1 Kantika 133 den Canta Alabanza na Jehova ta titulá “Sembrando Simia di Reino.” E ta basá riba Hesus su ilustrashon ku ta kompará e trabou di hasi disipel ku e sembramentu di simia. (Mat. 13:4-8, 19-23) E letranan dje kantika ta bisa: “Ma kuantu simia ta bai floresé/Por dependé di bo, mashá.” Kon nos por bira mas efikas den nos ministerio? Un manera ta dor di establesé i mantené un ruta di revista.
2 Nos por logra vários kos ku un ruta di revista. (1) Bishitanan regular kada dos siman ta hasi posibel pa bo desaroyá un relashon amikal ku e persona interesá. (2) Bo ta sòru pa e persona ei tin un suministro regular dje informashon salbador-di-bida ku tin den E Toren di Vigilansia i Spièrta! (3) Mediante bo kòmbersashonnan bo por yuda e persona desaroyá un anhelo pa bèrdat bíbliko, loke por hiba na un studio di Beibel.—1 Ped. 2:2.
3 Kon pa Kuminsá un Ruta di Revista: Ki ora ku un persona mustra interes den e revistanan, splik’é ku den kada edishon tin artíkulonan sobresaliente i ku gustosamente lo bo trese nan p’e kada dos siman. Despues ku bo bai, skirbi e persona su nòmber i adrès, e fecha dje bishita, e fecha dje edishonnan ku bo a laga, e artíkulo ku bo a resaltá i e temanan ku mas a interesá e persona.
4 Bo por kuminsá un ruta ku djis un par di hende. Anto hasi esfuerso pa oument’é dor di agregá otro hendenan ku bo ta laga revista kuné. Segun bo ruta ta krese, bo por organis’é geográfikamente di manera ku lo ta mas fásil pa kubrié. Tene un registro eksakto di kua edishon bo a laga na kada bishita i ki dia. Hasi un nota di loke bo a kòmbersá i kon pa sigui desaroyá e persona su interes den e bèrdat n’e siguiente bishita.
5 Inkluí Hende Profeshonal i di Negoshi: Eksperensia ta mustra ku doñonan di negoshi i otro hende profeshonal tin hopi chèns di aseptá nos revistanan riba un base regular. Un ansiano tabatin asta e alkalde di su pueblo komo su ruta di revista. Un publikadó a kuminsá un studio ku un hòmber di 80 aña, doño di un kompania di material di konstrukshon, despues ku e tabatin dies aña stret ta hiba e revistanan p’e!
6 Un ruman muhé pionero a drenta un pakus i a topa un pareha ku no a risibié masha kaluroso. Pero, komo ku nan a aseptá e revistanan, el a disidí di agregá e pareha na su ruta di revista. Ku tempu, e ruman muhé kier a stòp di bishitá nan pasobra nan tabata asina antipátiko i nunka no tabatin nada di bisa, ni ora el a pidi nan opinion riba algu. Pero e ruman muhé a hasi orashon tokante e asuntu i ku tempu a laga e buki Biba pa semper ku e pareha. Despues di les’é, e esposa a deklará: “Porfin mi a haña e bèrdat!” A kuminsá un studio di Beibel ku nan i despues e pareha a batisá. E perseveransia dje pionero en bèrdat a produsí bon fruta.
7 Ora di Hasi e Rebishitanan: Ora bo risibí un revista nobo, lesa tur artíkulo. Buska puntonan ku lo atraé kada persona di bo ruta. Anto ora bo bolbe bèk serka nan, bo por bisa: “Ora mi tabata lesa e artíkulo aki, mi a pensa riba bo i kon kisas lo e interesá bo.” Publikadónan di tur edat por disfrutá di tin un ruta di revista. Asta un mucha chikitu por bisa: “Mi ta kontentu di mira señora atrobe. Señora su revistanan nobo di E Toren di Vigilansia i Spièrta! a yega. Mi ta kere ku señora lo gusta e artíkulo aki titulá . . .”
8 Lanta antisipashon pa artíkulonan binidero dor di hala atenshon na e kuadro titulá “Den Nos Siguiente Edishon.” Ora tin artíkulonan ku ta un seri, indiká esaki i animá e lektor pa no pèrdè ningun di nan. No lubidá ku kada biaha ku bo entregá e revistanan na un persona ku ta parti di bo ruta di revista, bo por konta un rebishita. I riba tur kos, kòrda ku bo meta ta pa un dia kuminsá un studio di Beibel ku e personanan aki.
9 Bishitá Hende di Bo Ruta Riba un Base Regular: Bo por kubri bo ruta di revista na kualkier ora ku ta práktiko: un dia den siman, parti atardi, anochi trempan òf den fin di siman despues di a traha un poko den e trabou di kas-pa-kas. Si bo no por kubri bo ruta debí ku bo ta malu òf afó ku fakansi, pidi un otro publikadó den bo famia òf den kongregashon pa entregá e revistanan pa bo. Den e manera ei, e hendenan di bo ruta lo no keda sin haña nan revistanan na tempu.
10 Un manera pa sembra simia di Reino ta dor di hiba E Toren di Vigilansia i Spièrta! regularmente na tur esnan di bo ruta di revista. Segun bo ta siña nan e bèrdatnan bíbliko, nan por kapta e sentido dje palabra di Reino i ku tempu produsí fruta di Reino huntu ku bo.—Mat. 13:8, 23.