Bo Por Pone Bo Kas Disponibel?

¹ Den promé siglo, hopi kristian a pone nan kas disponibel pa reunionnan di kongregashon. (1 Kor. 16:⁠19; Kol. 4:⁠15; Flm. 1, 2) Den algun kongregashon djawe, no tin sufisiente lugá disponibel pa tene e Studio di Buki di Kongregashon ni pa e reunion pa sirbishi di vèlt. Esaki por tin komo konsekuensia ku den algun grupo di studio di buki tin 30 hende òf mas presente, surpasando e kantidat rekomendá di 15 hende.

² Un Gran Privilegio: Bo a yega di pensa pa pone bo kas disponibel pa un Studio di Buki di Kongregashon? Un espasio sufisiente grandi ku ta limpi, bon iluminá i ku tin bon sirkulashon di airu ta ideal pa e propósito aki. Ya ku studio di buki ta un reunion di kongregashon i ta parti di Yehova su areglo pa instruí su pueblo, ta un gran privilegio pa por tin un studio di buki na bo kas. Hopi ta esnan ku a konta ku nan a benefisiá spiritualmente dor di a pone nan kas disponibel pa esaki.

³ Si bo ta pensa ku bo kas ta apropiá, sea asina bon di laga e ansianonan sa esei. Kisas nan ta buskando mas lugá pa reuní. Si no ta posibel pa tene un studio di buki na bo kas, ta posibel pa tene e reunion pa sirbishi di vèlt einan? Asta si no tin nesesidat aktualmente, e ansianonan lo apresiá di sa ku bo kas ta disponibel. Kisas den futuro lo bo disfrutá di e privilegio aki.

⁴ Mustra Bon Manera: Ora di reuní den un kas privá, tur esnan ku ta asistí tin ku mustra rèspèt pa e propiedat di e doño di kas. Mayornan tin ku hasi sigur ku nan yunan ta keda den e área disponibel pa e studio, i no ta bai den e áreanan privá di e kas. Tambe mester mustra konsiderashon na bisiña dor di evitá di kousa inkumbinensia innesesario pa nan.​—⁠2 Kor. 6:​3, 4; 1 Ped. 2:⁠12.

⁵ Hebreonan 13:⁠16 ta animá nos pa no lubidá “di hasi bon i di kompartí ku otro; pasobra sorto di sakrifisionan asina ta agradá Dios.” Poniendo bo kas disponibel pa un reunion di kongregashon ta un forma ekselente pa kompartí kos bon ku otro hende i di “onra SEÑOR ku bo rikesa.”​—⁠Pro. 3:⁠9.