Repaso di Skol di Ministerio Teokrátiko
Lo konsiderá e siguiente preguntanan oralmente durante e Skol di Ministerio Teokrátiko di e siman di 28 di aprel 2003. E superintendente di skol lo kondusí un repaso di 30 minüt basá riba e fuente di informashon ku a ser tratá den asignashonnan di e simannan di 3 di mart te ku 28 di aprel 2003. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontesta.—Mira e buki Skol di Ministerio, pág. 36-7.]
KUALIDAT DI PAPIA
1. Ki faktornan por stroba un persona di papia ku fluides? [1, be-PA pág. 93] (1) Sierto palabra ta deskonosí p’e; (2) e ta papia ku muchu pousa kòrtiku; (3) falta di preparashon; (4) su informashon no ta ser presentá den un manera lógiko; (5) vokabulario limitá; (6) e ta enfatisá demasiado palabra; (7) e no konosé e reglanan di gramátika muchu bon.
2. Korekto òf Inkorekto: Evitá di pousa, pasobra esei por pone hende su mente dual i duna nan chèns di interumpí bo. Splika. Inkorekto. Pousanan na momentunan oportuno ta yuda resaltá e ideanan prinsipal klaramente. E pousanan ei ta mustra ku bo tin algu di bisa ku ta bale la pena pa otronan tende i keda kòrda, kousando asina un impreshon mas duradero. [4, be-PA pág. 97-8]
3. Pakiko ta importante pa un oradó òf esun ku ta lesa den públiko papia ku énfasis ku ta komuniká sentido? (Neh. 8:8) [6, be-PA pág. 101] Énfasis ku ta komuniká sentido ta laga e presentashon sali na un manera kla, i ta yuda konvensé, motivá i keda ku atenshon dje ouditorio. (Idea prinsipal ta sufisiente.)
4. Kon bo por siña papia ku énfasis ku ta komuniká sentido? [7, be-PA pág. 102-3] Bo por siña papia ku énfasis ku ta komuniká sentido dor di studia e informashon ku bo tin ku lesa kuidadosamente; dor di identifiká e palabra òf grupo di palabranan klave den frasenan riba kua mester pone énfasis; dor di nota e kambionan di pensamentu i dor di tene bon kla na mente e puntonan prinsipal ku e ouditorio lo mester keda kòrda. (Idea prinsipal ta sufisiente.)
5. Kua ta e ideanan prinsipal ku bo tin ku enfatisá ora bo ta lesa na bos haltu for di un publikashon na un studio di Beibel òf na un reunion di kongregashon? [8, be-PA pág. 105] Bo tin ku enfatisá e kontestanan riba e preguntanan di e lès i tambe e pensamentunan konektá ku e suptema skirbí ku lèter diki bou di kua e informashon ku bo ta lesa ta kai. (Idea prinsipal ta sufisiente.)
PARTI NUM. 1
6. Kiko mayornan por hasi pa entrená nan yunan “pa nan tende i siña” na reunionnan kristian? (Deu. 31:12) [1, be-PA pág. 16] (1) Mayornan por trese nan yunan na tur reunion di kongregashon, asamblea i kongreso. (2) Na kas nan por pone nan yunan sinta ketu pa sierto oranan fiho i wak plachi òf lesa. (3) Kaminda ta práktiko, nan por duna nan yunan nan ehemplar personal di e publikashonnan ku ta ser studiá na reunion i yuda nan prepará pa partisipá den e reunionnan. (Idea prinsipal ta sufisiente.)
7. Kiko ta e paradeis spiritual? [2, w01-PA 1/3 pág. 8-10] E paradeis spiritual ta referí na e ambiente ku ta “yen di e konosementu di SEÑOR” i den kua tin un manifestashon abundante di “e fruta di e spiritu,” ku ta permití hende disfrutá di pas ku Dios i ku su próhimo. (Idea prinsipal ta sufisiente.)—Isa. 11:9; Gal. 5:22, 23.
8. Kon Proverbionan 8:1-3 ta mustra ku e sabiduria di Dios ta disponibel pa tur hende, i segun Kolosensenan 2:3, na unda hende por hañ’é? [3, w01-PA 15/3 pág. 25, 28] Beibel ta bisa ku e sabiduria di Dios ta “yama” i “para” [“posishoná su mes,” NW] tur kaminda ku tin hende, i e ta disponibel den lugánan públiko, manera na porta i entrada di un stat. Hesus ta e ehèmpel di tur loke un hende mester sa p’e por manifestá sabiduria di Dios. (Idea prinsipal ta sufisiente.)—Echo. 4:12.
9. Kon nos por hasi e nòmber di Dios konosí? (Huan 17:6) [5, be-PA pág. 273-5] Den nos kòmbersashonnan nos por usa e nòmber di e Dios berdadero en bes di djis e títulonan manera “Dios” òf “Señor.” Nos por mustra hende e nòmber di Dios den Beibel i na otro lugánan, manera inskripshonnan riba edifisionan públiko. Tambe ta vital pa hala atenshon na e soberania, propósito, kualidatnan i normanan di Esun ku ta karga e nòmber ei. (Idea prinsipal ta sufisiente.)
10. Ki detayenan importante hende mester sa relashoná ku e “bon notisia di e reino”? (Mat. 24:14, BPK) [7, be-PA pág. 279-80] Hende tin ku sa ku na 1914 Hesus a wòrdu koroná komo Rei di e Reino di Dios. Despues di esei, Diabel i su demoñonan a ser tirá aki bou riba tera. Nos ta den e último dianan di e sistema di kosnan aki, i pronto e Reino di Dios lo tuma akshon definitivo pa eliminá tur opositor di e soberania di Dios for di riba tera i establesé un hustu mundu nobo. (Idea prinsipal ta sufisiente.)—Dan. 2:44; 7:13, 14; Rev. 12:7-10; 21:2-4.
LESAMENTU SEMANAL DI BEIBEL
11. (a) Den promé siglo, kiko tabata “e abominashon di desolashon” (òf “kos repugnante”) ku Marko 13:14 ta papia di dje? Esei tabata e ehérsito romano ku su emblemanan úniko. E emblemanan ei tabata práktikamente ídolo i tabata algu abominabel òf repugnante p’e hudiunan. (Idea prinsipal ta sufisiente.) (b) Na kiko e palabranan “pará kaminda e no mester ta” ta referí? Nan ta referí na su atake riba Yerúsalèm i e tèmpel na aña 66 di nos era. [2, w99-PA 1/5 pág. 15 §6]
12. Kon e Evangelio di Lukas ta mustra ku Hesus tabata e heredero natural (via nasementu) di e trono di David? (Luk. 3:23-38) [3, w92-S 1/10 pág. 9 § 3] Lukas ta mustra kon Hesus su liña di desendensia atraves di su mama natural, Maria, ta bai bèk te David. En kambio, e relato di Mateo ta mustra kon e liña di desendensia atraves di José, e tata di kriansa di Hesus, ta hiba te David, mustrando ku Hesus tabata e heredero legal dje trono di David. (Idea prinsipal ta sufisiente.)
13. Kiko Hesus tabata kier men ku su deklarashon skirbí na Lukas 12:2? Ounke e fariseonan a tapa nan maldat dor di duna e impreshon ku nan ta masha religioso, ku tempu nan a keda desenmaskará. Mas despues, ku kurashi Hesus su disipelnan a riska nan bida denunsiando e hipokresia dje fariseonan malbado. (Idea prinsipal ta sufisiente.)—Luk. 12:3-5. [6, gt-PA 77]
14. Den Hesus su ilustrashon tokante e moneda di plata pèrdí, pakiko e reakshon dje angelnan ta remarkabel? (Luk. 15:10) Ki efekto nan ehèmpel mester tin riba nos? E pekadónan pèrdí di e ilustrashon tin speransa di forma parti di e Reino selestial di Dios. Komo resultado, nan ta alkansá un posishon den shelu ku ta mas haltu ku esun dje angelnan mes! Pero en bes di sinti envidia òf sinti ku a pasa nan por alto, e angelnan ta rekonosé humildemente ku e hendenan pekaminoso aki a enfrentá i vense situashonnan ku lo yuda nan sirbi komo rei i saserdote selestial kompasivo i miserikordioso. (Idea prinsipal ta sufisiente.) [7, gt-PA 85]
15. Kua ta e dos paktonan ku Lukas 22:29 [NW] ta menshoná? Hesus su palabranan “mi ta sera un pakto ku boso” ta referí na e pakto di e Reino ku Hesus a sera ku su siguidónan. Su palabranan “meskos ku mi Tata a sera un pakto ku mi” aparentemente ta referí n’e pakto ku Yehova a sera kuné p’e bira un saserdote manera Mèlkísedèk tabata, segun Salmo 110:4. (Idea prinsipal ta sufisiente.) [9, w98-PA 1/2 pág. 17 §18; it-2-S pág. 575 (it-1-E pág. 524)]