Trabou Ku Ta Refreská
1 E mensahe di Beibel ta refreská tur hende ku asept’é i aplik’é den nan bida. (Sal. 19:7, 8) E ta yuda nan libra nan mes di siñansanan falsu i di práktikanan perhudisial, i ta ofresé un speransa konfiabel pa futuro. Sin embargo, no ta hende ku ta risibí e bon nobo so ta benefisiá. Esnan ku ta kompartí e bèrdatnan refreskante di Beibel ku otro hende, tambe ta ser refreská.—Pro. 11:25.
2 Sirbishi Ta Duna Vigor: Hesus a bisa ku esnan ku ta dispuesto pa karga e yugo figurativo komo un disipel kristian, lo a haña “refreskamentu pa [nan] alma.” (Mat. 11:29, NW) Hesus mes a haña vigor dor di prediká na otro hende. Esei tabata manera kuminda p’e. (Juan 4:34) Ora el a manda e 70 disipelnan bai prediká, nan a alegrá ora nan a mira kon Yehova a apoyá nan esfuerso.—Luk. 10:17.
3 Hopi kristian djawe tambe ta haña vigor dor di partisipá den e trabou di prediká. Un ruman muhé a bisa: “E sirbishi ta refreskante pasobra e ta duna mi bida un enfoke i propósito. Problemanan personal i tenshonnan di tur dia ta bira ménos importante ora mi ta den sirbishi.” Un otro predikadó seloso a bisa: “Sirbishi . . . ta pone ku kada dia ku pasa Yehova ta bira un persona mas real pa mi, i ta duna mi pas i un grado di felisidat interno ku mi no por haña via ningun otro medio.” Esta un gran privilegio nos tin di por ta “Dios su kolaboradónan”!—1 Kor. 3:9.
4 Kristu Su Yugo Ta Suave: Ounke kristiannan ta ser animá pa “hasi tur esfuerso,” Hesus no ta eksigí mas di loke nos por duna. (Luk. 13:24) Sí, amorosamente e ta invitá nos pa ‘bini bou di su yugo huntu kuné.’ (Mat. 11:29, NW, nota na pia di pág.) Rumannan ku tin ku lucha ku sirkunstansianan difísil por tin e konfiansa ku nan sirbishi di kurason ta agradá Dios, asta si e ta limitá.—Mar. 14:6-8; Kol. 3:23.
5 Ta masha refreskante pa sirbi un Dios ku ta apresiá loke sea ku nos hasi na fabor di su nòmber. (Heb. 6:10) Laga nos semper hasi esfuerso pa dun’é lo mihó.