Un Karta di Kuerpo Gobernante

Rumannan stimá,

“GRASIA sea ku boso i pas di Dios nos Tata i di Señor Hesukristu.” (1 Kor. 1:3) Nos ta anhelá mashá pa yega e tempu ora ku tur loke ta hala rosea ta duna Yehova e gloria ku e meresé! (Sal. 150:6) Segun ku nos ta spera riba e gran dia ei, nos ta sigui proklamá e bon nobo di e Reino di Dios i hasi disipel.

Aktualmente e enfoke di e obranan di Yehova riba tera ta e trabou di prediká. (Mar. 13:10) Dor ku nos ta bon konsiente kon interesá Yehova ta den e trabou aki, nos ta resa pidié yudansa, ya ku nos ta realisá ku tur hende tin chèns di benefisiá di e areglo di reskate. (Rev. 14:6, 7, 14, 15) Ounke ta sierto ku nos ta haña nos konfrontá ku situashonnan difísil, nos ta masha gradisidu ku nos ta “wòrdu bistí ku poder for di ariba” pa kumpli ku nos sirbishi.—Luk. 24:49.

Ta un satisfakshon pa wak bèk riba e aña di sirbishi ku a kaba di pasa i mira loke Yehova a logra mediante su sirbidónan leal. Ku poder di spiritu santu e pueblo di Dios a desplegá e amor ku Kristu a desplegá, vensiendo e odio ku ta reina mundialmente. E amor ei tabata bisto na nos kongresonan. Di yüni te ku desèmber 2003, delegadonan for di mas ku shen pais a biaha bai 32 kongreso internashonal riba sinku kontinente. Misionero-, sirbidónan internashonal i bètelitanan ku ta sirbi den estranheria a ser entrevistá na kongresonan internashonal i di distrito.

Na e kongresonan ei nos a risibí e publikashonnan “Mira e Tera Bunita” i Siña for di e Gran Maestro. A anunsiá tambe ku un vershon revisá di e buki di instrukshon pa Skol di Sirbishi di Pionero ta programá pa sali na fin di e aña di sirbishi 2004. Gradualmente, rumannan ku tin hopi aña ta traha pionero i ku a asistí na e skol kaba lo djòin klasnan di esnan ku resientemente a kuminsá traha pionero.

Apoyo divino i generosidat humano a hasi posibel ku por a konstruí hopi mas Salòn di Reino, foral den paisnan ku tin ménos rekurso. Debí n’e kresiente nesesidat pa alimento spiritual rònt mundu, tin proyektonan pa ekspandé sukursal andando den hopi pais. Awor e foyeto Disfruta di bida riba tera pa semper! ta disponibel na 299 idioma, i un total di 139 mion ehemplar di e foyeto aki a keda imprimí; e buki Conocimentu cu Ta Hiba na Bida Eterno a surpasá 93 mion ehemplar i ta na 161 idioma; i a imprimí mas ku 200 mion ehemplar di e foyeto Kico Dios Ta Rekerí di Nos? na un total di 267 idioma.

Nos ta yama un kaluroso bon biní na e 258.845 rumannan ku a simbolisá nan dedikashon mediante boutismo den awa durante e último aña di sirbishi! E echo ku boso ta apoyá e reino di Dios no a hasi boso solamente e blanko spesial di Satanas su odio, sino tambe personanan spesial ku ta risibí Yehova su bendishon i protekshon spiritual segun ku boso ta kore e kareda ku tin boso dilanti. (Heb. 12:1, 2; Rev. 12:17) Sí, boso por ta sigur ku “Esun ku ta warda bo[so] lo no kabishá.”—Sal. 121:3.

E teksto di aña pa 2004, “Sea alerto . . . Sea prepará,” ta masha oportuno. (Mat. 24:42, 44) E Palabra di Dios ta deskribí kristiannan komo habitantenan temporal den e sistema di kosnan muribundo aki. (1 Ped. 2:11; 4:7) P’esei, nos tin ku keda enfoká riba kosnan spiritual, mantené nos bida simpel i eksaminá nos kurason kuidadosamente. “E gran dragon” kier devorá nos, apsorbá nos den su sistema di kosnan.—Rev. 12:9.

Pa nos keda alerta, lesamentu di Beibel tur dia ta esensial. E por yuda nos ‘laga nos Sí ta Sí’ relashoná ku nos dedikashon, i yuda nos “tene firme na e prinsipio di nos siguransa te na fin.” (Sant. 5:12; Heb. 3:14) Lesamentu di Beibel tur dia por yuda nos kòrda kon leu e mundu a desviá for di Dios su normanan inkambiabel. (Mal. 3:6; 2 Tim. 3:1, 13) Konosementu di Beibel por yuda nos evitá “fábulanan trahá ku astusia,” i pa keda fiel na Yehova.—2 Ped. 1:16; 3:11.

Mayornan boso ta yuda boso yunan pone metanan spiritual i keda “alerta,” segun ku boso ta lanta nan den e disiplina i instrukshon di Yehova? (Efe. 6:4) Boso ta eduká nan pa nan tin e mesun punto di bista di nan futuro ku e hòmber mas sabí ku a yega di biba riba tera tabatin di su futuro? Hesus por tabata e mihó karpinté, arkitekto òf dòkter na mundu, pero en bes di hasi esei el a traha den e sirbishi di tempu kompletu. Laga su ehèmpel motivá boso pa yuda boso yunan pone interesnan di Reino na promé lugá den nan bida.

Di kurason e esklabo fiel, representá pa e Kuerpo Gobernante, ta masha gradisidu na e “multitut grandi” ku ta yud’é kumpli ku e responsabilidat ku e tin di perkurá pa e ‘evangelio aki di e reino wòrdu prediká den henter mundu komo un testimonio na tur nashon.’ (Rev. 7:9; Mat. 24:14, 45) Rumannan stimá, sea sigur ku Yehova ta kòrda “boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.” (Heb. 6:10) Segun ku boso ta lesa e eksperensianan emoshonante i ta tuma nota di e resultadonan di boso esfuersonan uní, sabi ku boso a hunga un papel importante den duna e testimonio mundial aki.

Sigui enfrentá futuro ku kurashi segun ku boso ta tene boso ‘bista fihá riba e rekompensa.’ No laga niun hende ni demoño stroba boso di hañ’é. (Heb. 11:26; Kol. 2:18) Sí, pone konfiansa den Yehova ku e siguransa ku lo e yuda tur hende ku stim’é alkansá e propósito kompletu di bida.—Juan 6:48-54.

Sea sigur ku ta un goso pa nos traha huntu ku boso pa duna alabansa n’e gloria di Yehova.

Boso rumannan,

Kuerpo Gobernante di Testigunan di Yehova