Repaso di Skol di Ministerio Teokrátiko
Lo konsiderá e siguiente preguntanan oralmente den e Skol di Ministerio Teokrátiko durante e siman ku ta kuminsá dia 28 di yüni 2004. E superintendente di skol lo kondusí un repaso di 30 minüt basá riba e fuente di informashon ku a ser tratá den asignashonnan di e simannan di 3 di mei te ku 28 di yüni 2004. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Kiko por pone nos papia na un manera innatural òf zona demasiado formal ora nos ta riba plataforma? [be-PA pág. 179 §4] Siendo ku palabra riba papel normalmente ta distinto for di palabra papiá, si nos ripití ekspreshonnan presis manera nan ta pará skirbí òf lesa nan direktamente for di un boskeho durante un diskurso, nos diskurso lo no tin estilo di kòmbersashon. Un struktura di frase kompliká tambe por pone un diskurso zona artifisial òf innatural. Nos por mantené un estilo di kòmbersashon si nos ekspresá ideanan den nos mes palabranan.
2. Pakiko mehorashon di e kalidat di nos stèm no ta djis un asuntu di hala rosea na un manera adekuá i relahá múskulonan tenso? [be-PA pág. 181 §2] Bon kalidat di stèm tin di haber ku nos personalidat tambe. Ora nos ta berdaderamente interesá den otro hende, nan ta sinti esei den nos stèm.
3. Ora nos ta kompartí e bèrdatnan di Beibel ku otro hende, ki pasonan práktiko nos por tuma pa “bira tur kos pa tur hende”? (1 Kor. 9:20-23) [be-PA pág. 186 §2-4] Nos mester siña opservá bon. Dor di ta un bon opservadó nos por haña sa kosnan ku por yuda nos mustra interes personal apropiá. Tal bes nos por saka afó ki trabou e doño di kas tin. Kisas tin dekorashonnan òf lemanan ku ta revelá su kreensianan religioso. Dor di kompartí informashon bíbliko spesífiko ku tin berdadero nifikashon pa hende den nos teritorio tambe ta mustra ku nos ta interesá den nan pensamentunan i nan bienestar.
4. Kiko skucha ku atenshon den sirbishi di vèlt ta enserá? [be-PA pág. 187] (1) Animá un persona p’e ekspresá su mes, anto pousa sufisiente largu p’e kontestá. (2) Skucha bon ora e ta papia. (3) Gradisié ku el a duna su punto di bista. (4) Hasié pregunta ku takto pa bo por komprondé su manera di pensa mihó. (5) Prepará bon pa nos tin un idea kla di loke nos kier bisa, lokual ta yuda nos relahá i paga mas tinu.
5. Pakiko ta importante pa mustra rèspèt pa tur hende ku nos topa den sirbishi? [be-PA pág. 190] Tur hende ku nos topa “a wòrdu trahá den e semehansa di Dios.” (Sant. 3:9) Kristu a muri pa kada un di nan i p’esei nan meresé pa tende e bon nobo pa nan por aktua di akuerdo kuné i ser salbá.
PARTI NUM. 1
6. Ku ki meta nos ta duna instrukshon teokrátiko, i kiko lo yuda nos alkansá e meta ei? (Mat. 5:16; Juan 7:16-18) [be-PA pág. 56 §3–pág. 57 §2] Nos ta siña otro hende ku e meta pa onra Yehova. Nos mester trata pa evitá tur loke por desviá nos for di e meta ei. Pues ora nos ta pensa kiko nos lo bisa òf kon nos lo bis’é, ta bon pa nos puntra nos mes: ‘Esaki lo pone hende haña apresio pa Yehova, òf lo e hala atenshon na ami?’
7. Pakiko ta benefisioso pa hasi kontraste ora di siña otro hende, i kon Hesus a hasi uso di e método di siñansa aki? [be-PA pág. 57 §3; pág. 58 §2] Un kontraste ta yuda hende mira kon e bèrdat ta diferensiá for di otro kreensianan. Hesus a hasi kontraste entre e komprondementu popular di e Lei di Moisés i e berdadero sentido di e Lei, entre berdadero deboshon na Dios i e hipokresia di e fariseonan, entre e aktitut di halsa bo mes riba otro hende i e spiritu di sakrifisio propio, i entre e hende ku ta hustu den su mes bista i berdadero arepentimentu. (Mat. 5:21-48; 6:1-18; 20:25-28; 21:28-32)
8. Na kontraste ku e fariseonan, kon Hesus su siñansa a alkansá kurason di hende? [be-PA pág. 59 §2-3] Hesus a siña hende obedensia di kurason motivá pa amor pa Dios. (Mat. 15:8) El a animá hende pa analisá nan motibunan. (Mar. 2:8) En kambio, e fariseonan a pasa por haltu e asuntunan di mas peso i a pone hopi énfasis riba kumpli ku detayenan menor i reglanan ku nan mes a traha. Di e manera ei nan a djis duna e impreshon di ta santu. (Luk. 11:42)
9. Kon nos por yuda un persona ku nos ta instruí apliká loke e ta siña sin tuma desishon p’e? [be-PA pág. 60 §1-3] Ora nos siñ’é un prinsipio bíbliko, nos por menshoná un situashon di bida diario anto puntra e studiante kon e prinsipio di Beibel lo por yud’é trata ku e situashon na un manera sabí. Ora nos splika i apliká tekstonan di Beibel na un manera korekto, meskos ku Pedro a hasi na Pentekòste, hopi bes e personanan ku ta buska e bèrdat ku un kurason sinsero lo sinti nan motivá pa nan mes dal e pasonan apropiá. (Echo. 2:37)
10. Kon nos mester respondé e preguntanan ku otro hende ta hasi tokante kosnan ku ta nan mes tin ku disidí? [be-PA pág. 69 §4-5] Semper nos tin ku respondé ku grasia. (Kol. 4:6) Ounke nos sa kiko nos lo a hasi, nos tin ku kòrda ku kada ken ta responsabel pa su mes desishonnan den bida. (Gal. 6:5) Pues, ora un hende puntra nos kiko nos lo a hasi den un situashon spesífiko, nos mester hala atenshon na prinsipio- i ehèmpelnan di Beibel òf mustra e persona kon e por hasi su mes investigashon p’e por ‘entrená su mente pa diserní loke ta bon i loke ta malu.’ (Heb. 5:14)
LESAMENTU SEMANAL DI BEIBEL
11. Pakiko Moisés tabatin ku pega fielmente na “e diseño di e tabernakel i e diseño di tur su artíkulonan-di-uso”? (Eks. 25:9) [it-2-S pág. 1078 §6] E modelo aki tabata un “sombra di e kosnan selestial,” un refleho di e realidat spiritual, i p’esei tur su detayenan mester tabata eksakto. (Heb. 8:5)
12. Kiko nos por siña for di e manera ku Aaron a respondé Moisés tokante e insidente di e bisé di oro? (Eks. 32:24) Kualke intento pa hustifiká bo mes hopi bes ta zona ridíkulo i no tin ningun sentido. Nos mester aseptá responsabilidat òf kulpa pa nos erornan. [3, g73-S 22/5 pág. 3; w60-S pág. 210 §2, 3]
13. Ki lès nos por saka for di e fe ku e israelitanan a demostrá dor ku nan a obedesé Yehova su mandamentu na Eksodo 34:23 i 24? E echo ku tur e hòmbernan israelita a subi bai Yerusalèm tres bes pa aña pa asistí n’e asambleanan einan tabata un tèst di nan fe den e promesa di Yehova. E hudiunan tabata rondoná pa nashonnan enemigu. For di un punto di bista humano, e enemigunan aki a haña un oportunidat fásil pa ataká e tera na momentu ku tur e hòmbernan tabata n’e fiestanan na Yerusalèm. Meskos tambe awe, pa nos asistí na reunionnan i asambleanan nos mester tin un fe fuerte den e promesa ku Dios a duna nos di perkurá pa nos nesesidatnan físiko si nos buska e Reino promé. (Mat. 6:33) [4, w98-PA 1/9 pág. 20; w67-S pág. 724]
14. Kiko tabata e propósito di un sakrifisio di komunion? (Lev. 3:1, NW) Esei tabata pa selebrá e kondishon bendishoná di pas ku hende aprobá pa Dios a disfrutá di dje. Tantu e saserdotenan komo esun ku a hasi e ofrenda a tuma parti di e sakrifisio despues ku e sanger i vèt a ser ofresé na Yehova. Na un manera impreshonante i simbóliko, e persona ku a hasi e ofrenda a kompartí un kuminda ku e saserdotenan i Yehova Dios. Esei a simbolisá e relashon pasífiko ku a eksistí entre nan. [6, w00-PA 15/8 pág. 15 §15]
15. Kon e prosedura di instalashon en konekshon ku Aaron, registrá na Levítiko 8:23, ta apliká simbólikamente na Hesus? [it-1-S pág. 650 §7; w68-S pág. 687 §24] Durante su ministerio di tres aña i mei aki riba tera ku a terminá ora el a duna su bida komo sakrifisio, orea di Kristu tabata kontinuamente atento p’e instrukshonnan di Yehova ekspresá den e Palabra skirbí. El a usa su abilidatnan físiko i mental i su rekursonan kompletamente pa hasi e trabou ku Dios a mand’é hasi; el a duna lo mihó di su mes. I nunka Hesus su pia a desviá for di e kaminda smal di integridat.