Kaha di Pregunta

◼ Kon nos mester trata ku nos asignashonnan di kongregashon?

E manera ordená ku un kongregashon di Yehova su pueblo ta funshoná ta bin dor di esfuerso uní. (1 Kor. 14:33, 40) Djis pensa riba tur e kosnan enbolbí pa tene un solo reunion di kongregashon. Fuera di e programa mes, tin hopi aktividat ku ta tuma lugá promé i despues di e reunion segun ku e rumannan ta kumpli ku vários asignashon. Tambe tin otro trabounan importante ku ta tuma lugá pero ku otro hende no ta mira. Kon kada un di nos por apoyá e areglo aki?

Hasi bo mes disponibel. Esnan ku ta dispuesto pa yuda lo ripará ku tin hopi kos di hasi. (Sal. 110:3) Mustra interes den rumannan malu i esnan di edat. Yuda ku limpiesa di Salòn di Reino. Nos por hasi hopi kos útil sin ku otro hende tin ku pidi nos. Simplemente nos mester tin e deseo di yuda.

Sirbi humildemente. Hende humilde ta kontentu pa sirbi otronan. (Luk. 9:48) Si nos ta konsiente di nos limitashonnan, nos lo evitá di aseptá mas trabou di loke nos por atendé realístikamente. Ademas, humildat lo yuda nos pa no pasa e límite di nos outoridat.—Pro. 11:2.

Sea konfiabel. Moisés a haña animashon pa skohe “hòmbernan konfiabel” pa tuma puestonan di responsabilidat den Israel di antigwedat. (Eks. 18:21) Nos tin mester di e mesun kualidat ei awe. Kumpli kuidadosamente ku kada asignashon ku bo risibí. (Luk. 16:10) Si bo no por kumpli ku un asignashon, sòru hasi areglo apropiá pa un otro hende kumpli kuné durante bo ousensia.

Duna lo mihó. Beibel ta urgi kristiannan pa traha di henter alma asta ora ta trata di asuntunan ku no tin di haber ku kos spiritual. (Kol. 3:22-24) Pues nan tin mas motibu ainda pa hasi esei ora nan ta traha pa promové adorashon berdadero. Asta si e tarea ta parse algu humilde òf insignifikante, si e wòrdu hasi bon, e kongregashon ta benefisiá.

Kada asignashon ta duna nos oportunidat pa demostrá nos amor pa Yehova i pa nos rumannan. (Mat. 22:37-39) Sea kual sea e tarea ku nos haña, laga nos kumpli kuné fielmente.