Yuda Bo Yunan Progresá den e Ministerio
1 Mayornan kristian tin e responsabilidat serio di train nan yunan for di chikitu den e ministerio. Nan por logra esaki den vários manera. Tin mucha ku por bisa un teksto di Beibel apropiá for di nan kabes asta promé ku nan por lesa. Esaki por tin un efekto poderoso riba e oyentenan. Segun ku e chikitinnan ta krese, nan por hasi asta mas den sirbishi. Kon mayornan por yuda nan yunan duna testimonio? Kisas e siguiente sugerensianan por duna mas yudansa.
2 Despues di un saludo, lo bo por bisa:
◼ “Mi yu hòmber, [su nòmber], tin un teksto di Beibel importante ku e ke pa bo tende.” Bo yu lo por bisa: “E teksto aki den e buki di Salmo a siña mi un di e promesanan di Dios. [E yu ta lesa òf bisa Salmo 37:9 i 10 for di su kabes.] E revistanan aki ta papia di e kosnan ku Yehova Dios lo bai hasi pa nos. Mi por laga nan pa señora (òf mener)?” Abo por finalisá e kòmbersashon, splikando kon e obra mundial ta ser sostené.
3 Òf lo bo por purba e introdukshon aki:
◼ “Bon dia. Mi ta bezig ta train mi yu muhé, [su nòmber], pa mustra interes den otro hende den e komunidat. E tin gana di kompartí un mensahe kòrtiku for di Beibel ku bo.” E yu lo por bisa: “Un manera ku mi ta gusta yuda hende ta dor di konta nan di e speransa ku Beibel ta duna pa futuro. [E yu ta lesa òf bisa Revelashon 21:4 for di su kabes.] E revistanan aki ta splika kiko e Reino di Dios lo hasi pa nos. Mi ta kere ku señora (òf mener) lo gusta nan.”
4 Dor di usa un introdukshon simpel konsistentemente, nos por yuda nos yunan haña konfiansa den nan abilidat di kompartí e mensahe di Reino. Ora boso ta train, hasi sigur ku e yunan ta papia kla i ku e volúmen adekuá, pasobra esei lo yuda nan papia bou di vários sirkunstansia. Bon preparashon di antemano i elogio sinsero lo yuda e chikitinnan ekspresá nan fe.
5 Hopi hóben a kualifiká pa bira publikadó no-batisá dor ku nan a wòrdu animá di e manera ei. Ta ki un goso pa mira nos yunan progresá den e ministerio kristian!—Sal. 148:12, 13.