Disfrutá di Bo Estudio di Kiko Beibel Ta Siña Realmente?
1 Un rasgo emoshonante di e Kongresonan di Distrito “Obedensia na Dios” tabata e presentashon di e buki Kiko Beibel Ta Siña Realmente? Pronto nos lo usa e buki aki ekstensamente den nos sirbishi di vèlt, spesialmente ora nos ta kondusí estudio di Beibel. P’esei, nos tin ku familiarisá nos mes bon ku e publikashon nobo aki. Esaki lo ta posibel pasobra nos lo studi’é na Estudio di Buki di Kongregashon kuminsando e siman di 17 di aprel 2006.
2 E superintendente di Estudio di Buki di Kongregashon lo hala atenshon na e preguntanan ku ta aparesé na prinsipio di kada kapítulo. Despues lo e kondusí e estudio usando e preguntanan na pia di página. Lo lesa i konsiderá e tekstonan klave, i ta bon pa usa e kuadro “Loke Beibel Ta Siña” na fin di kada kapítulo pa repasá e informashon ya ku e kuadro ta kontené kontesta bíbliko pa e preguntanan di introdukshon di e kapítulo. Lo ta un goso pa bo duna komentario pasobra e buki aki ta trata tópikonan den un manera kla, simpel i interesante.
3 E apèndiks ta duna detaye riba vários tópiko. Nos lo por usa e sekshon aki ora studiantenan di Beibel tin mester di mas informashon tokante un sierto tópiko. Tin bes lo trata porshonnan di e apèndiks durante Estudio di Buki di Kongregashon. E lektor di e estudio lo lesa henter e informashon di e apèndiks riba un tópiko, i artíkulonan mas largu por ser lesá den sekshon. No tin pregunta di estudio den e apèndiks. Pero e superintendente por animá e presentenan pa duna komentario dor di hasi preguntanan ku ta resaltá e puntonan prinsipal.
4 Na Estudio di Buki di Kongregashon nos lo pasa lihé dor di e buki Beibel Ta Siña. Pero ora nos ta studi’é ku otro hende nos no tin nodi bai ku e mesun velosidat, foral si e personanan sa poko òf no sa nada mes di Beibel. (Echo. 26:28, 29) Durante estudionan di Beibel na kas, nos lo tin ku konsiderá e tekstonan di Beibel mas a fondo, splika ilustrashon, etcetera. Pues, pone komo meta pa bo ta presente tur siman i partisipá plenamente na nos estudio di e buki Kiko Beibel Ta Siña Realmente?