Un Karta di Kuerpo Gobernante

“Grasia sea ku boso i pas di Dios nos Tata i di Señor Hesukristu.” Esaki ta e saludo ku Pablo a usa den hopi di su kartanan na e kongregashonnan. I e palabranan aki ta transmití bon kla loke nos ta deseá boso tur.—Efe. 1:2.

Nos ta masha gradisidu pa e grasia òf bondat inmeresí ku Yehova a demostrá na nos mediante e sakrifisio di reskate di Kristu Hesus! Ta dor di e reskate ei nos por tin un posishon aprobá dilanti Dios. Maske kuantu nos studia Beibel, prediká e bon nobo òf hasi bon obra, hamas nos lo por a logra esaki a base di nos esfuersonan. Yehova ta pordoná nos pikánan i duna nos bida eterno, no komo pago pa nos esfuersonan, sino komo regalonan ku ta reflehá Yehova su grasia òf bondat inmeresí mediante Hesukristu.—Rom. 11:6.

Pablo a skirbi su kompañeronan kreyente: “Nos . . . ta roga boso pa no risibí e grasia di Dios en bano—pasobra e ta bisa: ‘Den e tempu aseptabel mi a skucha bo, i riba e dia di salbashon mi a yuda bo’; mira, awor ta ‘e tempu aseptabel,’ mira, awor ta ‘e dia di salbashon.’” Tabatin un “tempu aseptabel” promé ku e destrukshon di Yerusalèm den e promé siglo. E personanan sinsero ku a stima Yehova a ser salbá den sentido spiritual. Ku tempu esaki a hiba na salbashon literal pa tur hende fiel ku a hui for di Yerusalèm promé ku e destrukshon a bini na aña 70 di nos era.—2 Kor. 6:1, 2.

Awe tambe nos ta biba den un “tempu aseptabel” i un “dia di salbashon.” E personanan ku Yehova ta aseptá komo su sirbidónan i ku ta ser salbá den sentido spiritual tin e speransa di salba literalmente riba “e gran dia di SEÑOR” ku ta asina serka awe.—Sof. 1:14.

E binidero dia di Yehova ta pone un responsabilidat serio riba nos. Nos tin ku spièrta hende tokante e dia aki i tambe yuda esnan sinsero benefisiá di Yehova su bondat inmeresí pa nan tambe por ser salbá. Pablo a realisá kon serio e responsabilidat aki ta. El a skirbi: “Ai di mi si mi no prediká evangelio!” Tambe el a usa e palabranan aki pa ekspresá su sintimentunan: “Mi ta debedó . . . tantu di e sabínan komo di esnan ku no ta sabí. P’esei, di mi parti, mi ta ansioso pa prediká e evangelio.”—1 Kor. 9:16; Rom. 1:14, 15.

Yehova lo tene nos responsabel si nos neglishá e trabou di spièrta hende aki ku ta di sumo importansia. Nos ta konsiente di loke Yehova a bisa profeta Ezekiel: “Yu di hende, mi a hasi bo guardia di e kas di Israel. Ki ora ku bo tende un palabra for di mi boka, spièrta nan pa mi. Ora mi bisa e malbado: ‘Lo bo muri sigur’, i abo no spièrt’é, ni papia pa spièrta e malbado pa laga su mal kaminda pa e biba, e malbado ei lo muri den su inikidat, ma su sanger lo mi eksigí for di bo man.”—Eze. 3:17, 18.

E último dianan aki ta difísil pa trata kuné. No ta fásil pa balansá asuntunan familiar, aktividatnan di kongregashon, e trabou di prediká i otro asuntunan. Ademas, hopi di boso ta lucha ku malesa, depreshon, behes i asta oposishon. Mayoria di boso ta “kargá.” Nos ke laga boso sa ku nos tin e mesun sintimentu pa boso ku Hesus tabatin ora el a bisa: “Bin serka mi tur ku ta kansá i kargá, i lo mi duna boso sosiegu.” (Mat. 11:28) Sinseramente nos kier elogiá boso tur ku a hasi esfuerso pa sigui sirbi Yehova fielmente apesar di desafionan grandi òf chikitu.

Un resultado di boso trabou di prediká i siña ku entusiasmo i Yehova su bendishon tabata ku mundialmente un promedio di 4.762 persona a batisá tur siman. Durante e último aña di sirbishi, a forma 1.375 kongregashon nobo. Nos ta spera i ta pidi Dios pa e buki nobo Kiko Beibel Ta Siña Realmente?, ku ya kaba ta disponibel na mas ku 120 idioma, yuda miónes di hende benefisiá di e bondat inmeresí i pas di Yehova durante e “dia di salbashon” aki.

Sea sigur ku e Kuerpo Gobernante ta stima boso i ku nos ta hasi orashon pa boso. Nos ta gradisí boso tambe p’e orashonnan ku boso ta hasi pa nos.

Boso Rumannan,

Kuerpo Gobernante di Testigunan di Yehova