Repaso di Skol di Ministerio Teokrátiko
Lo konsiderá e siguiente preguntanan na e Skol di Ministerio Teokrátiko durante e siman ku ta kuminsá dia 30 di òktober 2006. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 4 di sèptèmber te ku 30 di òktober 2006. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Dikon ta importante pa nos ta trankil i balansá ora nos ta papia, i kon nos por redusí ansiedat? [11 di sèpt., be-PA pág. 135 §5–pág. 137 §2, kuadronan] Si nos ta trankil i balansá, ta mas probabel ku nos oyentenan lo konsentrá riba loke nos ta bisa en bes di riba nos. Nos por redusí ansiedat dor di prepará bon, train nos presentashon na bos haltu, pidi Yehova yuda nos i haña mas eksperensia mediante nos partisipashon regular den aktividatnan teokrátiko.
2. Ora hende hasi pregunta tokante nos kreensianan, pakiko nos ta purba usa Beibel pa kontestá nan? [9 di òkt., be-PA pág. 143 §1-3] E motibu prinsipal pakiko nos ta usa Beibel ta pasobra e ta e Palabra di Dios, i nos ta basa nos kreensianan i nos manera di biba i nos speransa pa futuro riba e promesanan inspirá di Beibel. (2 Tim. 3: 16, 17) Siguiendo Hesus su ehèmpel, nos no ta papia di nos mes, sino mas bien ta referí hopi bes na e Skritura pa kontestá pregunta. (Mat. 4:3-10; Luk. 24:27, 44-47)
3. Kon nos por bira mas ábil den usa Beibel? [16 di òkt., be-PA pág. 144, kuadro] Nos por bira mas ábil den usa Beibel dor di les’é tur dia, inkluí tekstonan bíbliko ora nos ta komentá na reunion i determiná kiko Beibel ta bisa di un asuntu promé ku nos tuma desishon. Ora nos no sa kiko Beibel ta bisa di un asuntu, nos ta bai buska informashon en bes di rei òf duna nos opinion personal.
4. Dikon ta importante pa usa Beibel frekuentemente ora nos ta siña hende den sirbishi, i kon nos por animá e ouditorio pa us’é na reunionnan di kongregashon? [23 di òkt., be-PA pág. 145-6, kuadronan] Beibel por motivá hende sinsero mas lihé ku kualke kos ku nos por bisa personalmente. Ora un persona mira ku su mes wowo loke Beibel ta bisa, esei ta kousa un impreshon mas profundo. Ora di duna diskurso den kongregashon, invitá e ouditorio direktamente pa buska e tekstonan, anto duna nan sufisiente tempu pa haña nan
5. Kiko ta e dos metanan ku nos tin ora di introdusí un teksto? [30 di òkt., be-PA pág. 147 §2] Ora nos ta introdusí un teksto, nos meta ta pa krea ekspektativa i resaltá e motibu pakiko nos ta usa e teksto.
PARTI NUM. 1
6. Ki mensahe relevante i útil tin den buki di Salmonan? [18 di sèpt., si-S pág. 104 §23] E salmonan ta duna nos un komprondementu penetrante di e siñansanan fundamental di Beibel, i ta papia prinsipalmente tokante Yehova, e Outor di e Salmonan. Nan ta mustra klaramente ku e ta e Kreadó di universo i di tur loke tin den dje. (Sal. 8:3-9; 90:1, 2; 100:3; 104:1-5, 24; 139:14)
7. Na ki tempu nan a skirbi i kompilá Proverbionan? [2 di òkt., si-S pág. 107 §5] Sin duda e mayor parti di Proverbionan a wòrdu skirbí durante e reinado di Salomon (1037-998 P.E.K.) promé ku el a desviá. Siendo ku a kompilá un di e sekshonnan durante e reinado di Ezekias (745-717 P.E.K.), no ta posibel ku nan a kaba ku tur e kompilashon promé ku Ezekias su reinado. Esaki ta inkluí e último dos sekshonnan di e buki, ku tambe a wòrdu kompilá bou di Rei Ezekias su supervishon. (Pro. 25: 1) Un nota iluminador na pia di página di Proverbionan 31:31 den e “Tradukshon di Mundu Nobo di e Santu Skritura—Ku Referensia” ta bisa: “Algun [edishon] di e teksto [hebreo] tin e trigrámaton, òf tres lèternan, ‘Jehth, Zá·yin, Qohf’ (חזק) ku ta representá e firma di Rei Ezekias poné den e kopianan ku su eskribanan a traha pa indiká ku e obra tabata kla.”
8. Kiko ta un proverbio, i dikon e título hebreo di e buki ta apropiá? [9 di òkt., si-S pág. 107 §6] Un proverbio ta un dicho breve i al kaso ku hopi bes ta kompará dos kos ku ta kasi meskos òf ku ta kontraste di otro, i ku tin komo meta pa pone e oyente pensa. Na prinsipio, den e Beibelnan hebreo e buki a haña e nòmber “mish·léh,” basá riba e palabra di apertura di e buki ku ta nifiká “proverbionan.” “Mish·léh” ta un forma plural di e sustantivo hebreo “ma·shál,” ku por lo general nan ta kere a ser derivá di un palabra básiko ku ta nifiká “ser manera” òf “komparabel ku.” E términonan aki ta deskribí e kontenido di e buki hopi bon.
9. Na Proverbionan 2:1-5, kiko e animashon pa sigui buska konosementu, komprondementu i disernimentu “manera plata, i rondi’é manera tesoro skondí,” ta nifiká? [16 di òkt., be-PA pág. 38 §4] E komparashon ei den Proverbionan ta nifiká trabou duru pero tambe hopi rekompensa. Investigashon ta eksigí esfuerso, pero si nos hasié lo e yuda nos averiguá kiko Dios ta pensa di sierto asuntunan, korigí ideanan robes i duna nos un mihó komprondementu di e bèrdat. Tambe esei lo duna nos presentashonnan mas bida i hasi nan mas práktiko, i nan lo ta un fuente di plaser pa nos i pa nos ouditorio.
10. Di ki manera e buki di Proverbionan mes ta revelá ta pakiko e ta probechoso? [23 di òkt., si-S pág. 109 §19] E promé versíkulonan di e buki mes ta deklará ta pakiko e ta probechoso ya ku nan ta resaltá konosementu, sabiduria i komprondementu komo kualidatnan esensial pa sirbi Yehova di un manera aseptabel. (Pro. 1:2-4)
LESAMENTU SEMANAL DI BEIBEL
11. Kon David a ‘kalma i trankilisá su alma manera un mucha kitá for di pechu ta drumi serka su mama,’ i kon nos por imit’é? (Sal. 131:1-3) Meskos ku un mucha kitá for di pechu ta siña haña konsuelo i satisfakshon den brasa di su mama, asina David a siña kalma e deseo fuerte di su alma dor di rekonosé su limitashonnan i desplegá humildat. E no a aspirá prominensia, ni e no a promové su mes òf hasi uso di poder pa bira rei. Ku humildat i pasenshi el a spera riba Yehova. Nos por imitá David dor di no hasi esfuerso pa buska prominensia ni rekonosementu. En bes di promové nos mes, nos mester spera riba Yehova. [11 di sèpt., w06-PA 1/9 “E Palabra di Yehova Ta Bibu—Puntonan Sobresaliente di Buki Sinku di Salmonan”; w77-S 1/12 pág. 732-3]
12. Ki konsuelo nos por saka for di e palabranan inspirá di Salmo 139:7-12? No tin un lugá riba tera kaminda Yehova no por yega. Su spiritu santu por yega serka nos sin importá na unda nos ta. No tin ningun sirkunstansia ku lo por stroba Dios di alkansá nos. Si nos hasi esfuerso pa sirbi Yehova, e lo por lanta nos for di morto. Yehova su sirbidónan leal i fiel por konta riba su sosten amoroso. [18 di sèpt., w06-PA 1/9 “E Palabra di Yehova Ta Bibu—Puntonan Sobresaliente di Buki Sinku di Salmonan”; w93-PA 1/10 pág. 12-13]
13. Ta kua ta algun ehèmpel di Yehova su grandesa menshoná den Salmo 145 pa kua nos por alab’é den nos orashonnan i den e ministerio públiko? (Sal. 145:3) Ehèmpelnan di Yehova su grandesa inskudriñabel pa kua e por ser alabá ta entre otro: su obranan impreshonante di kreashon (vers. 9, 10), su echonan poderoso di salbashon na fabor di su sirbidónan leal (vers. 4, 6, 14, 18-20), su bondat den proveé tur loke ta nesesario pa bida eterno (vers. 7, 15, 16), i su personalidat (vers. 7-9, 17). [25 di sèpt., w04-PA 15/1 pág. 10-14; w90-S 15/9 pág. 11-15]
14. Den ki manera temor di Yehova ta “e prinsipio di konosementu” i “e prinsipio di sabiduria”? (Pro. 1:7; 9:10) Sin e temor di Yehova, no por tin berdadero konosementu, pasobra e ta Kreadó di tur kos i Outor di e Skritura. (Rom. 1:20; 2 Tim. 3:16, 17) E ta e Fuente di tur e konosementu aki. P’esei, tal konosementu ta kuminsá ku temor respetuoso di Yehova. Tambe temor di Dios ta e prinsipio di sabiduria pasobra no por tin sabiduria sin konosementu. Ademas, un persona ku no tin temor di Yehova lo no usa su konosementu pa onra e Kreadó. [2 di òkt., w06-PA 15/9 “E Palabra di Yehova Ta Bibu—Puntonan Sobresaliente di e Buki di Proverbionan”; rs-S pág. 171]
15. Na Proverbionan 7:1 i 2, kiko “mi palabranan” i “mi mandamentunan” ta enserá? Fuera di e siñansanan di Beibel, e palabranan i mandamentunan aki ta enserá reglanan di famia ku mayornan a stipulá. (Deu. 6: 6, 7; Efe. 6:4) Si e reglanan di e mayornan no ta kontradisí e lei di Dios, yunan mester sigui nan, ya ku e mayornan a stipulá nan motivá pa amor i pa bienestar di e famia. (Pro. 6: 20-22) [9 di òkt., w06-PA 15/9 “E Palabra di Yehova Ta Bibu—Puntonan Sobresaliente di e Buki di Proverbionan”; w00-PA 15/11 pág. 28]”