Repaso di Skol di Ministerio Teokrátiko
Lo konsiderá e siguiente preguntanan di repaso na e Skol di Ministerio Teokrátiko durante e siman ku ta kuminsá dia 25 di yüni 2007. E superintendente di skol lo kondusí un repaso di 30 minüt basá riba e informashon ku a ser tratá den asignashonnan di e simannan di 7 di mei te ku 25 di yüni 2007. [Nota: Kaminda no tin referensia despues di e pregunta, lo bo tin ku hasi bo propio investigashon pa haña e kontestanan.—Mira e buki Skol di Ministerio, pág. 36-7.]
KUALIDAT DI PAPIA
1. Pa nos por mehorá e kalidat di nos stèm ora nos ta papia, kiko nos por hasi pa aliviá tenshon? [be-PA pág. 185 §1-3] Na promé lugá nos mester mira nos oyentenan for di e punto di bista korekto. Si ta hende ku nos ta topa den sirbishi di vèlt, nos tin ku kòrda ku nan tin ku tende e bèrdatnan balioso ku nos sa kaba tokante e propósito di Yehova; sea ku nan ta konsiente di esei òf no. Si nos ta dunando un diskurso na Salòn di Reino, nos mester kòrda ku nos ta papiando ku amigunan, i nan kier lo mihó pa nos. Na di dos lugá nos kalidat di bos lo mehorá si nos relahá e múskulonan di palu di garganta, di garganta, i di nos skoudernan.
2. Kon nos por ‘bira tur kos pa tur sorto di hende’ den nos ministerio? (1 Kor. 9:20-23) [be-PA pág. 186 §2-4] Un manera ta di averiguá kiko ta interesá hende, kiko ta nan kreensianan religioso òf situashon di famia promé ku nos papia ku nan. Pensa kuidadosamente riba kon lo bo por aserká hende ku un presentashon ku lo ta realmente signifikativo pa nan. Nos mester pone meta pa prepará pensamentunan bíbliko apropiá pa diferente tipo di hende ku nos lo por topa den sirbishi. (1 Tim. 2:4)
3. Kon nos por imitá Yehova su ehèmpel di skucha otro hende? (Gén. 18:23-33; 1 Rei. 22:19-22) [be-PA pág. 187 §1-2, 5] Nos ta hasi esei animando hende pa ekspresá nan mes i skucha nan atentamente ora nan ta papia. Despues ku nos hasi un pregunta apropiá, nos mester pousa un ratu pa nan por kontestá. Ora nos “ta lihé pa tende” nos ta mustra ku nos ta onra pensamentu i sintimentu di otro hende. (Sant. 1:19; Rom. 12:10)
4. Den ki maneranan práktiko nos por yuda otro hende hasi progreso spiritual? [be-PA pág. 187 §6–pág. 188 §3] Ora nos ta mustra interes den otro hende mediante nos orashonnan, esei lo konmové nos pa sigui pensa riba nan ku e meta di kompartí bèrdatnan bíbliko ku lo satisfasé nan nesesidatnan mas mihó. Nos lo por yuda studiantenan di Beibel pa buska informashon den nos publikashonnan pa yuda nan trata ku situashonnan ku nan ta konfrontá. Nos meta semper mester ta pa laga e Palabra di Dios i Dios su spiritu motivá nan, pasobra Yehova kier pa hende sirbié ku un kurason boluntario. (Sal. 110:3)
5. Dikon nos mester ta interesá den mustra rèspèt pa otro hende? [be-PA pág. 190 §3, kuadro] Rèspèt pa otro hende ta un rekisito kristian ku ta yuda krea un ambiente den kua otro hende lo ta mas dispuesto pa aseptá e mensahe ku nos ta proklamá. Ademas, mustra rèspèt pa otro hende por kita opstákulo ora nos ta kompartí e bon nobo.
PARTI NUM. 1
6. Dikon nos mester trata pa yega na kurason di e hendenan ku nos ta siña? [be-PA pág. 59 §1] Ta masha importante pa yega na e kurason pasobra adorashon berdadero no ta djis un asuntu di memorisá sierto echo i kumpli ku sierto regla. Adorashon berdadero ta basá riba un bon relashon ku Yehova i apresio pa su kamindanan. (Deu. 10:12, 13; Luk. 10:25-27)
7. Ki efekto nos ehèmpel tin riba nos studiantenan? [be-PA pág. 61 §1] Nos akshonnan ta duna un ehèmpel práktiko di e manera pa apliká e kosnan ku nos ta siña nan. Mucha ku ta imitá nan mayornan kier sa kiko nan ta sinti ora nan hasi e kosnan ku nan mayornan ta hasi. Meskos tambe, ora nos studiantenan ‘bira imitadó di nos, meskos ku nos ta di Kristu,’ nan ta kuminsá eksperensiá e bendishonnan di kana den e kaminda di Yehova. (1 Kor. 11:1)
8. Kon nos por mehorá nos arte di kòmbersá na kas? [be-PA pág. 62 §3] E kos prinsipal pa mehorá e arte di kòmbersá ta nos interes profundo den otro hende. (Deu. 6:6, 7; Pro. 4:1-4) Un otro faktor importante ta ku nos mester tin algu di bisa ku ta bale la pena. Nos por usa puntonan for di nos programa personal di lesa i studia Beibel, un dushi eksperensia ku nos a haña den sirbishi di vèlt i otro temanan edifikante ku por kontribuí na kòmbersashonnan sano di famia.
9. Ki ehèmpel di selo yen di kurashi profeta Jeremias a pone? [si-S pág. 129 §36] Ku kurashi Jeremias a proklamá un mensahe impopular na un pueblo malbado. El a rechasá amistat ku hende malbado. El a komprondé e urgensia di e mensahe di Yehova i a dediká su mes di henter su kurason na e trabou di Yehova sin entregá. P’e e palabra di Dios tabata manera un kandela den su wesunan, i un gran alegria i goso den su kurason. (Jer. 15:16, 17; 20:9)
10. Ki konfiansa e buki di Lamentashonnan ta transmití, pero di ki manera e buki ta benefisioso ora e ta mustra e severidat di Dios su huisio kontra e malbadonan? [si-S pág. 132 §13] E buki di Lamentashonnan ta ekspresá Jeremias su konfiansa kompletu den Dios. E buki mester inspirá obedensia i integridat den tur adoradó berdadero, i na mes momento mester sirbi komo un spièrtamentu fuerte pa esnan ku no ta tene kuenta ku e nòmber di mas grandi i lokual ku e ta representá. E buki sigur ta probechoso ora e ta deskribí e severidat di Dios pa ku hende ku ta keda rebelde, kabesura i ku no ta arepentí.
LESAMENTU SEMANAL DI BEIBEL
11. Na armonia ku Jeremias su eksperensia deskribí na Jeremias 37:21, di kiko nos por ta sigur? Yehova a sostené Jeremias durante e sitiamentu di Yerusalèm, ora hende ‘a kome pan na midí i den ansha’ i ora algun hende muhé asta a kome karni di nan mes yunan. (Eze. 4:16; Lam. 2:20) Jeremias su eksperensia ta sigurá sirbidónan fiel di Yehova ku asta ora ta parse ku no tin speransa, E por sostené nan durante e último dianan i atraves di Armagedón. [7 di mei, w97-PA 15/9 pág. 3-4; w77-S 1/1 pág. 20-1]
12. Dikon Baruk a bisa ku Yehova ‘a añadí tristesa na su doló,’ i di e manera ei pon’é ‘kansa,’ anto kon Baruk a reakshoná na promé instante riba e problema? (Jer. 45:1-5) Kisas Baruk su tristesa i kansansio tabata debí na e echo ku e hudiunan no a reakshoná faborabel i a ignorá spièrtamentu ku nan a haña frekuentemente pa hopi aña, i tòg a sigui den nan apostasia. Komo resultado Baruk a kuminsá ‘buska kosnan grandi pa su mes,’ podisé rikesa material, siguridat i prominensia. Yehova amorosamente a rekord’é ku kalamidat sigur-sigur tabata na kaminda; pues, no tabata tempu pa sigui tras di kosnan ku ta strob’é spiritualmente. [21 di mei, w06-PA 15/8 pág. 17-18; w97-PA 15/8 pág. 21]
13. For di ki tempu Babilonia no a wòrdu habitá mas, birando “kompletamente desolá”? (Jer. 50:13) Despues di aña 140 promé ku nos era, e tera rònt di Babilonia a bira saturá ku salu i alkali, pues tabata imposibel pa us’é pa agrikultura. Un 200 aña despues, Babilonia ainda tabata un stat ku un poblashon hopi grandi, pero e situashon no a keda asina pa hopi tempu. (1 Ped. 5:13) Den siglo 3 di nos era, e historiadó Dion Kasio (mas o ménos 150-235 E.K.) a menshoná ku un bishitante na Babilonia no a haña nada otro sino “seritu i piedra i ruina.” [28 di mei, ct-S pág. 106-7]
14. Ki prinsipio nos por saka for di Lamentashonnan 3:8, 9 i 42-45, relashoná ku orashon? Na aña 607 promé ku nos era Yehova no a skucha orashon di hudiunan inkoregibel. Pa Dios kontestá nos orashonnan, nos mester ta obediente na dje i mustra berdadero arepentimentu. (Pro. 28:9) [18 di yüni, w06-PA 1/9 pág. 22 §4]
15. Kiko e garoshi deskribí na Ezekiel kapítulo 1 ta simbolisá? E vehíkulo glorioso aki ta simbolisá e parti invisibel di Yehova su organisashon, ku ta konsistí di tur Dios su fiel kriaturanan spiritual. Yehova ta kore e garoshi aki den e sentido di ku e ta us’é pa kumpli ku su propósito. (Sal. 103:20; Eze. 1:22, 25, 26, 28) E ta kumpli rápidamente ku e boluntat divino i ta bai unda ku ta i ki ora ku ta, manera e spiritu di Dios mand’é. (Eze. 1:12, 14) [25 di yüni, od-PA pág. 9; w91-S 15/3 pág. 10-11]